പുനലൂര്: ആര്ട്ട് ഓഫ് ലിവിംഗ് ആചാര്യന് ശ്രീശ്രീ രവിശങ്കര് വിഭാവനം ചെയ്ത വൈഎല്ടിപി കോഴ്സിന് പുനലൂരില് നാളെ തുടക്കം. പുതിയിടത്ത് ശ്രീകൃഷ്ണസ്വാമി ക്ഷേത്രത്തിന് സമീപം കണ്ണന് ആര് കേയ്ഡില് നാളെ ആരംഭിക്കുന്ന കോഴ്സ് 20ന് സമാപിക്കും. ആര്ട്ട് ഓഫ് ലിവിംഗ് 35-ാം വാര്ഷികാഘോഷത്തിന്റെയും ഗുരുജിയുടെ 60-ാം പിറന്നാളിന് മുന്നോടിയായി സംസ്ഥാനത്ത് എല്ലാ ജില്ലകളിലും വൈഎല്ടിപി കോഴ്സുകള് സംഘടിപ്പിക്കുന്നുണ്ട്. ഇതിന്റെ ഭാഗമായാണ് പുനലൂരില് കോഴ്സ് നടത്തുന്നത്.
ഓരോത്തരിലും ആത്മീയചിന്തകളും മാനുഷികമൂല്യങ്ങളുമുയര്ത്തി പരസ്പരസ്നേഹവും വിശ്വാസവും വളര്ത്തി നമ്മുടെ തനതായ സംസ്കാരത്തില് ഊന്നിയുള്ള മുന്നേറ്റമാണ് ആവശ്യം. അതിന് ഊര്ജ്ജ സ്വലരായ, ലക്ഷ്യബോധമുള്ള യുവാക്കളാണ് ആവശ്യം. വൈഎല്ടിപിയിലൂടെ അത്തരമൊരു യുവജന കൂട്ടായ്മ സൃഷ്ടിച്ച് കേരളത്തില് ആദ്ധ്യാത്മിക-സാമൂഹിക-സാംസ്കാരിക പരിവര്ത്തനം സൃഷ്ടിക്കണമെന്ന ശ്രീശ്രീ രവിശങ്കറുടെ ആഹ്വാനപ്രകാരം എല്ലാ ജില്ലകളിലും വൈഎല്ടിപി കോഴ്സ് അരങ്ങേറും. ആര്ട്ട് ഓഫ് ലിവിംഗ് മുന്നോട്ട് വയ്ക്കുന്ന മനോഹരപദ്ധതിയാണ് യൂത്ത് ലീഡര്ഷിപ്പ് ട്രേയിനിംഗ് പ്രോഗ്രാം. അവനവില് ഉറങ്ങിക്കിടക്കുന്ന ആത്മീയശക്തിയെ ഉയര്ത്തി ആരോഗ്യകരമായ ശരീരവും മനസും ഊര്ജ്ജസ്വലമായ വ്യക്തിത്വവും സംശുദ്ധമായ ജീവിതവും ഉറപ്പാക്കുന്ന കോഴ്സ് സെല്ഫ് കോണ്ഫിഡന്സ്, പബ്ലിക്ക് സ്പീക്കിംഗ്, മാര്ക്കറ്റിംഗ് സ്കില്, വില്പവര് എന്നീ ഗുണങ്ങളും ഈ കോഴ്സിലൂടെ ലഭ്യമാക്കുമെന്ന് സംഘാടകര് അവകാശപ്പെടുന്നു. 18നും 35നും മധ്യേ പ്രായമുള്ളവര്ക്കുവേണ്ടിയാണ് ഈ കോഴ്സ്. കോഴ്സിന്റെ ഭാഗമായി നിരവധി സേവാപദ്ധതികള്ക്കും തുടക്കം കുറിക്കുമെന്നും സംഘാടകര് അറിയിച്ചു.
