പത്തനാപുരം: പത്തനാപുരം താലൂക്കു തല മോണിട്ടറിംഗ് സെല്ലിന്റെ നേതൃത്വത്തില് പത്തനാപുരം, പിറവന്തൂര്, അലിമുക്ക് എന്നീ പ്രദേശങ്ങളിലെ ഹോട്ടലുകള്, ബേക്കറികള്, പഴം പച്ചക്കറി, പലചരക്ക് വ്യാപാര സ്ഥാപനങ്ങള് എന്നിവിടങ്ങളില് പരിശോധന ഏര്പ്പെടുത്തി.
പരിശോധനയില് പത്തനാപുരം ടൗണിലെ ശ്രീശരവണ ഭവന് ഹോട്ടലില് അനധികൃതമായി സൂക്ഷിച്ച 80 ലിറ്റര് മണ്ണെണ്ണ പിടിച്ചെടുത്തു. പള്ളിമുക്കില് വൃത്തിഹീനമായി പ്രവര്ത്തിച്ചിരുന്ന അഭിലാഷ് ഹോട്ടല് വൃത്തിയാക്കുന്നതുവരെ അടച്ചിടാന് നോട്ടീസ് നല്കി. വിലവിവരപ്പട്ടിക പ്രദര്ശിപ്പിക്കാത്ത ആറ് വ്യാപാരസ്ഥാപനങ്ങള്ക്കെതിരെ കേസെടുക്കുകയും അമിതവില ഈടാക്കുന്ന വ്യാപാരികള്ക്ക് വില കുറക്കാനുള്ള കര്ശന താക്കീതും നല്കി. തുടര്ദിവസങ്ങളിലും പരിശോധന നടത്തുമെന്നും കുറ്റക്കാര്ക്കെതിരെ പ്രോസിക്യൂഷന് ഉള്പ്പെടെ നിയമനടപടികള് സ്വീകരിക്കുമെന്നും താലൂക്ക് സപ്ലൈ ഓഫീസര് അറിയിച്ചു. പരിശോധനയില് താലൂക്കു സപ്ലൈ ഓഫീസര് ഷാജി കെ.ജോണ്, ഡെപ്യൂട്ടി തഹല്സിദാര് അബ്ദുള് ബാരി, ഭക്ഷ്യസുരക്ഷ ഇന്സ്പെക്ടര് അനസ്, റേഷനിംഗ് ഇന്സ്പെക്ടര്മ്മാരായ സാറാമ്മ. വൈ, കെ. ഗിനികുമാര് എന്നിവര് പങ്കെടുത്തു.
