ഇരിട്ടി: തലശ്ശേരി വളവുപാറ കെഎസ്ടിപി റോഡിന്റെ ആദ്യ റീച്ചായ തലശ്ശേരി കളറോഡ് വരെയുള്ള ഭാഗത്തിന്റെ നിര്മ്മാണ പ്രവര്ത്തികള് ജനുവരിയില് ആരംഭിക്കുമെന്ന് അഡ്വ. സണ്ണി ജോസഫ് എം എല് എ താലൂക്ക് വികസന സമിതി യോഗത്തില് അറിയിച്ചു. ഈ ഭാഗത്തിന്റെ ടെണ്ടര് നടപടികള് പൂര്ത്തിയായി ക്കഴിഞ്ഞു. രണ്ടാം റീച്ചായ കളറോഡ് മുതല് കൂട്ടുപുഴ വരെ വരുന്ന ഭാഗത്തിന്റെ ടെണ്ടര് നടപടികള് പുരോഗമിക്കുകയാണ്. ഇതില് 22 ശതമാനം അധികം തുക വന്നത് മൂലം ലോകബാങ്ക് നിയമ പ്രകാരം നടപടികള് പൂര്ത്തിയാക്കാനായിട്ടില്ല. ഇത് പരിഹരിക്കാന് മന്ത്രിസഭ അടുത്തു തന്നെ തീരുമാനം കൈക്കൊള്ളും. അയ്യന് കുന്ന് പഞ്ചായത്തിലെ വെള്ളപ്പൊക്കം മൂലം തകര്ന്ന വാഴയില് പാലം ഉടന് പുനര് നിര്മ്മിക്കാന് നടപടികള് സ്വീകരിക്കും. ആറളം ഫാം ഹൈസ്കൂളില് കായികാദ്ധ്യാപകനെ നിയമിക്കാനുള്ള നടപടികള് സ്വീകരിക്കും.അയ്യന്കുന്നു വില്ലേജ് ഓഫീസ് ഉടന്തന്നെ പുതുക്കി പ്പണിയും .നാട്ടില് ഇല്ലാത്തത് മൂലം വോട്ട് തള്ളിയ വിദേശത്തുള്ളവര്ക്കും പട്ടാളക്കാര്ക്കും ഓണ്ലൈന് വഴി വോട്ടു ചേര്ക്കാവുന്നതാണെന്നു ഡെപ്യൂട്ടി ഇലക്ഷന് തഹസില്ദാര് കെ.സുരേഷ്ബാബു യോഗത്തില് അറിയിച്ചു.
വികസന സമിതി യോഗത്തില് ഇരിട്ടി തഹസില്ദാര് കെ.ആര്.രവീന്ദ്രന് അദ്ധ്യക്ഷത വഹിച്ചു. ബ്ലോക്ക് പഞ്ചായത്ത് പ്രസിഡന്റ് എന്.ടി.റോസമ്മ, പഞ്ചായത്ത് പ്രസിഡണ്ടുമാരായ ടി.ഇന്ദിര , എന്. അശോകന്, ഷേര്ളി അലക്സാണ്ടര്, പി.ശ്രീജ തുടങ്ങിയവര് പങ്കെടുത്തു.
