കൊല്ലം: തിരുവനന്തപുരത്തും കാസര്‍കോടും മാത്രമല്ല താമര വിരിയാന്‍ പോകുന്നതെന്നും കേരളത്തില്‍ മുഴുവന്‍ താമരവിരിയിപ്പിക്കുമെന്നും കെപിഎംഎസ് സംസ്ഥാന ജനറല്‍ സെക്രട്ടറി ടി.വി.ബാബു പറഞ്ഞു.
കൊല്ലം പീരങ്കിമൈതാനത്ത് നടന്ന സമത്വമുന്നേറ്റ യാത്രയില്‍ അദ്ധ്യക്ഷ പ്രസംഗം നടത്തുകയായിരുന്നു അദ്ദേഹം.
കാസര്‍കോട് നിന്നുമാരംഭിച്ച യാത്ര തിരുവനന്തപുരത്ത് അവസാനിക്കുമ്പോള്‍ കേരളത്തില്‍ വരാന്‍ പോകുന്ന മാറ്റത്തിന്റെ സൂചന നല്‍കും. കേരളത്തിലെ ഹിന്ദുസമുദായങ്ങള്‍ അവഗണന നേരിടാന്‍ തുടങ്ങിയത് ഇന്നോ ഇന്നലയോ അല്ല. കേരളത്തിലെ ആദ്യമന്ത്രിസഭ അധികാരത്തിലെത്തിയപ്പോള്‍ മുതല്‍ തുടങ്ങിയ അവഗണനക്ക് ഇപ്പോള്‍ 52 വര്‍ഷമാകുന്നു. ഞാനുമൊരു സിപിഐക്കാരനായിരുന്നു.
സ്വന്തം സമുദായത്തിന്റെ ആവശ്യത്തിനായി സോണിയ ഗാന്ധിയുമായി വേദി പങ്കിട്ടപ്പോള്‍ എന്റെ പാര്‍ട്ടിക്ക് എന്നില്‍ അസഹിഷ്ണുത തോന്നി. 30 വര്‍ഷം പ്രവര്‍ത്തിച്ച ഞാന്‍ അന്ന് രാജിവെച്ചു പുറത്ത് വന്നു. ഹിന്ദുഐക്യവേദിയുടെ കെ.പി.ശശികല ടീച്ചര്‍ വേദികളില്‍ പ്രസംഗിക്കുമ്പോള്‍ വിഘടനവാദമാണെന്ന് തോന്നിയിരുന്നു. പക്ഷേ ആ പറഞ്ഞ വാക്കുകളെല്ലാം സത്യമാണെന്ന് കാലം തെളിയിച്ചതായും ബാബു കൂട്ടിച്ചേര്‍ത്തു. ഹിന്ദുവിന്റെ അവകാശത്തെ ചോദ്യം ചെയ്യുമ്പോള്‍ വര്‍ഗീയത. ക്രിസ്ത്യനിക്കും മുസ്ലിമിനും വാരിക്കോരികൊടുക്കുന്നത് മതേതരത്വം. കേരളത്തിലെ അധികാര വര്‍ഗം വര്‍ഗീയതക്കും മതേതരത്വത്തിനും നല്‍കിയ അര്‍ത്ഥം ഇങ്ങനെയാണ്. ആറുമാസം കൊണ്ട് കേരളത്തിന്റെ രാഷ്‌ട്രീയ അന്തരീക്ഷം മാറും. നീതിക്ക് വേണ്ടി ഒരുകുടക്കീഴില്‍ ജനം അണിനിരക്കുമെന്നും ബാബു പറഞ്ഞു.
