വിനോജി ഏലപ്പാറ
ഏലപ്പാറ: വാഗമണ് ഉളുപ്പുണി എസ്.എച്ച് കോണ്വെന്റിലെ കന്യാസ്ത്രീയും പുള്ളിക്കാനം സെന്റ് തോമസ് ഹൈസ്കൂളിലെ അധ്യാപികയുമായ ലിസ മരിയ (42)യുടെ ദുരൂഹമരണം നാട്ടുകാരെയും ബന്ധുക്കളെയും ദുഖത്തിലാഴ്ത്തി. എങ്ങനെയാണ് ലിസ മരിച്ചതെന്ന് കണ്ടെത്തണമെന്നാണ് ബന്ധുക്കളുടെയും നാട്ടുകാരുടെയും ആവിശ്യം. ചൊവ്വാഴ്ച രാവിലെ പ്രാര്ത്ഥനയ്ക്ക് എത്താഞ്ഞതിനെത്തുടര്ന്ന് മറ്റ് കന്യാസ്ത്രീകള് നടത്തിയ തെരച്ചിലിലാണ് ലിസയുടെ മൃതദേഹം കോണ്വെന്റിന് സമീപത്തെ കിണറ്റില് മരിച്ച നിലയില് കണ്ടത്. കിണറിന് തൊട്ടടുത്ത് നിന്ന് ലിസയുടെ ചെരിപ്പും കാണപ്പെട്ടു. കോണ്വെന്റ് അധികൃതര് ഉടന് തന്നെ വാഗമണ് പോലീസില് വിവരം അറിയിക്കുകയായിരുന്നു. മരിച്ചുകിടന്ന ലിസ സഭാ വസ്ത്രമല്ല ധരിച്ചിരുന്നത്. നൈറ്റിയായിരുന്നു വേഷം. ലിസയുടെ ചുണ്ടുകളില് നിന്ന് മാംസം മുറിഞ്ഞ് പോയിട്ടുണ്ട്. മൃതദേഹം കരയ്ക്കെടുത്തപ്പോള് വായില് നിന്നും നുരയും ചോരയും ഒഴുകിയ നിലയിലായിരുന്നു. പോലീസും കോണ്വെന്റ് അധികൃതരും ലിസ ആത്മഹത്യ ചെയ്തതാണ് എന്ന നിലയിലാണ് പ്രതികരിക്കുന്നത്. എന്നാല് വിദ്യാര്ത്ഥികള്ക്കിടയിലും ഇടവകാംഗങ്ങള്ക്കിടയിലും ഉപ്പുതറയിലെ നാട്ടുകാര്ക്കിടയിലും മതിപ്പുള്ള ലിസ എങ്ങനെ ദുരൂഹസാഹചര്യത്തില് മരിച്ചു എന്നതാണ് സംശയത്തിന് ഇട നല്കുന്നത്. ലിസയ്ക്ക് മാനസിക സമ്മര്ദ്ദമുണ്ടായിരുന്നതായി കോണ്വെന്റ് അധികൃതര് പറയുന്നുണ്ടെങ്കിലും ഇതിന് സ്ഥിരീകരണമില്ല. മാത്രവുമല്ല മാനസിക പ്രശ്നങ്ങളുണ്ടെങ്കില് എങ്ങനെയാണ് വിദ്യാര്ത്ഥികളെ പഠിപ്പിച്ചിരുന്നത് എന്ന മറു ചോദ്യത്തിലും പ്രസക്തിയുണ്ട്. വാഗമണ് പോലീസ് അസ്വാഭാവിക മരണത്തിന് കേസെടുത്ത് അന്വേഷണം ആരംഭിച്ചിട്ടുണ്ട്.
