അഞ്ചല്: കിഴക്കന്മേഖലയില് ക്രഷര്ഭീഷണിക്ക് അറുതിയില്ല. പ്രശസ്തമായ അറയ്ക്കല് ദേവീക്ഷേത്രത്തിന് ഭീഷണിയായി നില്ക്കുന്ന ക്രഷര്യൂണിറ്റിനെതിരെ പരാതികളുമായി അധികൃതരെ സമീപിക്കുകയാണ് ക്ഷേത്രം ഭാരവാഹികള്. ക്ഷേത്രത്തില്നിന്നും 150 മീറ്റര് ഏരിയല് ദൂരത്തില് പ്രവര്ത്തിക്കുന്ന ക്രഷര് യൂണിറ്റിനെതിരെയാണ് പ്രതിഷേധം ശക്തമാകുന്നത്. ഈ ക്രഷര് യൂണിറ്റിനോട് ചേര്ന്നാണ് മലമേല് ക്ഷേത്രവും പാറയും സ്ഥിതിചെയ്യുന്നത്. നൂറുകണക്കിന് വാനരന്മാരുടെ ആവാസകേന്ദ്രം കൂടിയാണ് ഇവിടം. ദിനംപ്രതി നിരവധി ഭക്തജനങ്ങളും വിനോദസഞ്ചാരികളും എത്തുന്ന ഈ മേഖലയില് നിന്ന് ക്രഷര് യൂണിറ്റ് മാറ്റണമെന്നാണ് ആവശ്യം.
ഒലിപ്പുറത്ത് മലയെന്ന വലിയ കുന്നിന്റെ തെക്കുപടിഞ്ഞാറ് താഴ്വാരത്തായാണ് അറയ്ക്കല് ക്ഷേത്രം സ്ഥിതി ചെയ്യുന്നത്. ഒലിപ്പുറത്ത്മലയിലെ ആയിരവില്ലിപ്പാറയില് ക്രഷര് ഉടമകള് നടത്തിവന്നിരുന്ന ഖനനത്തിന് സര്ക്കാര് നിരോധനം ഏര്പ്പെടുത്തിയിട്ടുണ്ട്.
നിലവില് ക്രഷറിന് മലിനീകരണ നിയന്ത്രണബോര്ഡിന്റെയും മൈനിങ് ആന്ഡ് ജിയോളജി വകുപ്പിന്റെയും ലൈസന്സുകളില്ലെന്ന് അറയ്ക്കല് ക്ഷേത്രോപദേശക സമിതി ഭാരവാഹികള് ചൂണ്ടിക്കാട്ടുന്നു. അനധികൃത പാറഖനനവും ക്രഷര് പ്രവര്ത്തനങ്ങളും വഴി സര്ക്കാരിന് കോടിക്കണക്കിന് രൂപയുടെ സാമ്പത്തിക നഷ്ടമാണ് വരുത്തിയിട്ടുള്ളതെന്നും ഇവര് ആരോപിക്കുന്നു.
ക്രഷറിന്റെ പ്രവര്ത്തനം മൂലം വടക്കും കിഴക്കും മലയുടെ ചരിവില് ഇപ്പോഴും മണ്ണും പാറയും ഇടിഞ്ഞുവീണുകൊണ്ടിരിക്കുകയാണ്. മുമ്പ് പാറഖനനവും ക്രഷറും നിരന്തരം പ്രവര്ത്തിച്ചിരുന്നപ്പോള് മല ഇടിഞ്ഞ് പഴയ ദേവസ്വം ബോര്ഡ് ഓഫീസ് പൂര്ണമായും തകര്ന്നിരുന്നു.
മുഖ്യജല സ്രോതസ്സായ തീര്ത്ഥക്കുളത്തിനും കേടുപാടുകള് സംഭവിച്ചിരുന്നു. മലയിലെ ചെറിയ പാറക്കൂട്ടങ്ങള്ക്ക് ഇളക്കം തട്ടി സ്ഥാനചലനം സംഭവിച്ചിട്ടുണ്ട്. ക്രഷറില് നിന്നുമുയരുന്ന പൊടിപടലങ്ങലും വന് ശബ്ദങ്ങളും ക്ഷേത്രത്തിനും ക്ഷേതിരം വക കാവിനും സദ്യാലയത്തിനും സ്റ്റേജിനും ക്ഷേത്രാചാരങ്ങലുടെ നടത്തിപ്പിനും തടസ്സം സൃഷ്ടിക്കുന്നതായാണ് പരാതി. വാനരന്മാരുടെ ആവാസവ്യവസ്ഥയ്ക്ക് ഇത് സൃഷ്ടിക്കുന്ന കോട്ടത്തെപ്പറ്റി ഭൗമപഠനകേന്ദ്രം സര്ക്കാരിന് റിപ്പോര്ട്ട് നല്കിയിട്ടുണ്ട്.
ക്രഷര് യൂണിറ്റ് പ്രവര്ത്തിക്കുന്നതിനെതിരെ ജില്ലാ കളക്ടര്, ഇടമുളയ്ക്കല് പഞ്ചായത്ത് അധികൃതര്, മലിനീകരണനിയന്ത്രണബോര്ഡ് ചെയര്മാന് തുടങ്ങിയവര്ക്ക് പരാതി നല്കിയതായി അറയ്ക്കല് ദേവീക്ഷേത്രോപദേശക സമിതി ഭാരവാഹികളായ എ. ബിജു, സി. അനില്കുമാര്, വി. മോഹനന്പിള്ള എന്നിവര് അറിയിച്ചു.
