കൊച്ചി: വരുമാനവര്ദ്ധനവിന്റെ ഭാഗമായി പ്രൊഫഷണല് ടാക്സും വസ്തുനികുതിയും വര്ദ്ധിപ്പിക്കുമെന്ന് ഡപ്യൂട്ടി മേയര് ടി.ജെ വിനോദ് പറഞ്ഞു. നിലവില് 26 കോടി രൂപയാണ് നികുതിയിനത്തില് ലഭിക്കുന്നത്.ഇത് 50 കോടിയായി വര്ദ്ധിപ്പിക്കുകയാണ് ലക്ഷ്യം. നഗരസഭയുടെ ഉപയോഗിക്കാതെ കിടക്കുന്ന ആസ്തികളും ധനസമ്പാദനത്തിന് ഉപയോഗിക്കും. പ്രസ് ക്ലബ്ബിന്റെ മുഖാമുഖം പരിപാടിയില് സംസാരിക്കുകയായിരുന്നു അദ്ദേഹം. നഗരസഭയുടെ തനത് വരുമാനം 106-110 കോടിയാണ്. ഇതില് 80 കോടി ശമ്പളമായി ചിലവഴിക്കണം. വസ്തുനികുതി വര്ദ്ധിപ്പിക്കാതെ നഗരസഭയ്ക്ക് മുന്നോട്ടുനീങ്ങാന് കഴിയില്ല. കഴിഞ്ഞ 22 വര്ഷമായി കൊച്ചി നഗരസഭയുടെ വസ്തുനികുതി നിരക്ക് വര്ദ്ധിപ്പിച്ചിട്ടില്ല. മറ്റ് നഗരസഭകളേക്കാള് താരതമ്യേന കുറഞ്ഞ നിരക്കാണ് കൊച്ചിയില് ഈടാക്കുന്നത്. നികുതിവരുമാനത്തില് ആനുപാതിക വര്ദ്ധനവ് ആവശ്യമാണ്.
നഗരസഭയുടെ ഉടമസ്ഥതയിലുളള കെട്ടിടങ്ങളില് തുച്ഛമായ വാടകയാണ് നിലനില്ക്കുന്നത്. വാടകയിനത്തില് മൂന്നര കോടിയാണ് നഗരസഭയ്ക്ക് ലഭിക്കുന്നത്. നഗരസഭയ്ക്ക് പിടിച്ചുനില്ക്കണമെങ്കില് വാടകയിനത്തിലും വര്ദ്ധനവ് വേണം. ബ്രഹ്മപുരത്തെ മാലിന്യ പ്ലാന്റില് നിന്നുള്ള ജൈവമാലിന്യം നഗരസഭ വഴി വിപണനം നടത്തുന്ന കാര്യം പരിഗണിക്കുമെന്ന് ടി.ജെ വിനോദ് പറഞ്ഞു.
