പാനൂര്‍: പാനൂര്‍ നഗരസഭാ ആസ്ഥാനം പാനൂരില്‍ നിന്നു മാറ്റാന്‍ യുഡിഎഫ് നീക്കം. വിവാദ തീരുമാനത്തിനു പിന്നില്‍ മതപരമായ കരുനീക്കമെന്ന് സൂചന. പുതുതായി രൂപീകരിക്കപ്പെട്ട പാനൂര്‍ നഗരസഭാ കാര്യാലയം പെരിങ്ങത്തൂരിലേക്ക് മാറ്റാനാണ് ഗൂഢനീക്കം നടക്കുന്നത്. മുസ്ലീംലീഗിലെ ഒരുവിഭാഗമാണ് ഇതിനുപിന്നില്‍. നഗരസഭാ ആസ്ഥാനം പാനൂരാണെന്ന് ഗസറ്റ് വിജ്ഞാപനം നിലവിലുണ്ടെങ്കിലും അത് അട്ടിമറിക്കാനാണ് ശ്രമം. ഇത് വന്‍പ്രതിഷേധത്തിന് കാരണമാകും. ചെയര്‍പേഴ്‌സണ്‍ സ്ഥാനമേറ്റടുത്തതിനു ശേഷം മാധ്യമങ്ങളോട് കെവി.റംല പറഞ്ഞത് ഇപ്രകാരമായിരുന്നു. എല്ലാവര്‍ക്കും എത്തിപ്പെടാന്‍ സൗകര്യമുളള ഒരുസ്ഥലമാണ് നഗരസഭാ കാര്യാലയത്തിനായി കണ്ടെത്തുക. താത്ക്കാലികമായാണ് പാനൂര്‍ പഞ്ചായത്ത് ഓഫീസ് നഗരസഭ കാര്യാലയമാക്കിയിരിക്കുന്നത്. മുന്നണിയില്‍ ആലോചിച്ച് ഉചിതമായ തീരുമാനമെടുക്കുമെന്നുമാണ് മാധ്യമ പ്രവര്‍ത്തകരുടെ ചോദ്യങ്ങള്‍ക്ക് കെവി.റംല മറുപടി പറഞ്ഞത്. കരിയാട്, പെരിങ്ങളം, പാനൂര്‍ പഞ്ചായത്തുകള്‍ കൂട്ടിച്ചേര്‍ത്താണ് പുതിയ നഗരസഭ രൂപീകരിച്ചത്. പാനൂര്‍ ടൗണിലേക്ക് കരിയാട്, പെരിങ്ങളം ഭാഗത്തുളളവര്‍ക്ക് എത്തിപ്പെടാന്‍ പ്രയാസമാണെന്ന ന്യായവാദമുയര്‍ത്തിയാണ് പാനൂര്‍ നഗരസഭാ കാര്യാലയം മാറ്റാന്‍ ചില കോണുകളില്‍ നിന്നും ശ്രമമാരംഭിച്ചിട്ടുളളത്. പാനൂര്‍ ടൗണിനടുത്ത് പഞ്ചായത്ത് ഓഫീസ് കെട്ടിടത്തിനായി വിലയ്‌ക്കു വാങ്ങിയ സ്ഥലത്ത് നഗരസഭാ കാര്യാലയം പണിയാമെന്നിരിക്കെയാണ് ഈ കുത്സിത നീക്കം. സര്‍ക്കിള്‍ ഓഫീസ്, ഫയര്‍&റെസ്‌ക്യൂ സ്‌റ്റേഷന്‍, പ്രാഥമിക ആരോഗ്യകേന്ദ്രം, കെസ്ഇബി സെക്ഷന്‍ ഓഫീസ്, സബ്ട്രഷറി, എഇഒ.ഓഫീസ്, സബ് രജിസ്ട്രാര്‍ ഓഫീസ് തുടങ്ങിയ കേന്ദ്രങ്ങള്‍ സ്ഥിതി ചെയ്യുന്നത് പാനൂര്‍ ടൗണിലാണ്. താലൂക്ക് ആശുപത്രിക്കായി സ്ഥലമെടുത്തിരിക്കുന്നതും പാനൂരിലാണ്. ഇത് അവഗണിച്ചാണ് വിവാദ തീരുമാനം അടിച്ചേല്‍പ്പിക്കാന്‍ ഒരുവിഭാഗം ആലോചിക്കുന്നത്. നഗരസഭയുടെ മുഖമായ പാനൂരിനെ അവഗണിച്ച് ചിലരുടെ മതപരമായ ആവശ്യങ്ങള്‍ നിറവേറ്റുക എന്ന നിക്ഷിപ്ത താല്‍പ്പര്യമാണ് ഇവിടെ പ്രകടമാകുന്നത്.‘ഭരണരംഗം കയ്യാളുന്ന യുഡിഎഫിലെ പെരിങ്ങളം, കരിയാട് ഭാഗത്തുളള മുസ്ലീംലീഗ് പ്രതിനിധികള്‍ ലീഗ് നേതാക്കളുമായി ഇതുസംബന്ധിച്ച് ചര്‍ച്ച നടത്തിക്കഴിഞ്ഞു. എതിര്‍പ്പുകള്‍ ശക്തമാകുമെന്നതിനാല്‍ രഹസ്യമായി കാര്യങ്ങള്‍ നീക്കാനാണ് തീരുമാനം .ഇത് യുഡിഎഫില്‍ ആദ്യം ചര്‍ച്ചയ്‌ക്ക് വെച്ച് സമവായത്തിലെത്തിയ ശേഷം നടപടികള്‍ മുന്നോട്ടു കൊണ്ടുപോകാനാണ് ധാരണ. എന്നാല്‍ പാനൂരില്‍ നിന്നും നഗരസ‘കേന്ദ്രം മാറ്റാന്‍ ഒരുകാരണവശാലും സമ്മതിക്കില്ലെന്ന് ബിജെപി കൗണ്‍സിലര്‍ കെകെ.ചന്ദ്രന്‍ ജന്മഭൂമിയോട് പറഞ്ഞു. നീക്കം ആത്മഹത്യാപരമാണ്. എന്തുവിലകൊടുത്തും ഇതു തടയും. മുസ്ലീംലീഗിന്റെ ഹിഡന്‍ അജഡ അനുവദിക്കാനാകില്ലെന്നും സര്‍ക്കാര്‍ പ്രഖ്യാപിച്ച നഗരസഭാകേന്ദ്രം പാനൂരാണെന്നും അതിന് ഉചിതമായ സ്ഥലം കണ്ടെത്തി നിര്‍മ്മാണപ്രവൃത്തി ആരംഭിക്കണമെന്നും കെകെ.ചന്ദ്രന്‍ പറഞ്ഞു.
പാനൂര്‍ നഗരസഭാ ആസ്ഥാനം പാനൂരില്‍ നിന്നു മാറ്റാന്‍ യുഡിഎഫ് നീക്കം
ബന്ധപ്പെട്ട വാര്‍ത്തകള്‍
പുതിയ വാര്‍ത്തകള്‍
ജന്മഭൂമി ഓണ്‍ലൈന്‍© Mathruka Pracharanalayam Limited.
Tech-enabled by Ananthapuri Technologies.