കൊച്ചി: അമ്പലമേട് കൊച്ചി റിഫൈനറിയുടെ വികസനത്തിനായി കുടിയിറക്കപ്പെട്ടവര്‍ക്കും പ്രദേശവാസികള്‍ക്കും പണിനല്‍കുന്നില്ല. കുടിയിറക്കപ്പെട്ടവര്‍ക്ക് പണി നല്‍കണമെന്നാവശ്യപ്പെട്ട് ബിഎംഎസിന്റെ നേതൃത്വത്തില്‍ ആരംഭിച്ച റിലേ സത്യഗ്രഹ സമരം 34 ദിവസം പിന്നിട്ടു. സിഐടിയു, ഐഎന്‍ടിയുസി യൂണിയനുകളുടെ ശുപാര്‍ശയുണ്ടെങ്കില്‍ മാത്രമേ കമ്പനിയിലെ നിര്‍മ്മാണമേഖലയില്‍ പണി കിട്ടുകയുള്ളൂ. ഇത് ജില്ലാ കളക്ടറുടെ നേതൃത്വത്തില്‍ എടുത്ത തീരുമാനങ്ങള്‍ക്ക് വിരുദ്ധമാണ്. കമ്പനിയുടെ വികസനത്തിനായി പ്രദേശത്തെ 2,000 ഓളം കുടുംബങ്ങളാണ് കുടിയിറക്കപ്പെട്ടത്. കുടിയിറക്കപ്പെട്ടവര്‍ക്കും പ്രദേശവാസികള്‍ക്കും കമ്പനിയില്‍ നടക്കുന്ന നിര്‍മ്മാണ മേഖലയില്‍ പണിയെടുക്കാന്‍ ഒരു യൂണിയന്റെയും ശുപാര്‍ശ ആവശ്യമില്ലെന്നായിരുന്നു തീരുമാനം. കുടിയിറക്കപ്പെട്ടവര്‍ക്കും പ്രദേശവാസികള്‍ക്കും പ്രത്യേകം തിരിച്ചറിയില്‍ കാര്‍ഡും വിതരണം ചെയ്തിരുന്നു. എന്നാല്‍ ഇടത്- വലത് യൂണിയനുകളോട് ആഭിമുഖ്യം ഇല്ലാത്തവരെ പണിക്ക് കയറ്റാന്‍ അധികൃതര്‍ തയ്യാറാകുന്നില്ല. ബിജെപി, ബിഎംഎസ് സംഘടനയില്‍പ്പെട്ടവര്‍ക്ക് നിര്‍മ്മാണമേഖലയില്‍ പ്രവേശനം ഇല്ല.
ഇരുപതിനായിരത്തോളം പേരാണ് കൊച്ചി റിഫൈനറിയിലെ നിര്‍മ്മാണ മേഖലയില്‍ പണിയെടുക്കുന്നത്. എന്നാല്‍ അയ്യായിരത്തോളം പേര്‍മാത്രമാണ് സിഐടിയു, ഐഎന്‍ടിയുസി യൂണിയനില്‍പ്പെട്ടവരാണ്. ബാക്കിയുള്ളവരെ കോണ്‍ട്രാക്ടര്‍മാര്‍ ഇതരസംസ്ഥാനതൊഴിലാളികളെ ഇറക്കിയിരിക്കുകയാണ്. എന്നാല്‍ ഇതിന്റെ പേരിലും കോണ്‍ട്രാക്ടരില്‍നിന്നും ഇരു യൂണിയനുകളും വാങ്ങുന്നതായി ആരോപണം ഉണ്ട്. ചില യൂണിയന്‍ നേതാക്കള്‍ തന്നെ സബ് കോണ്‍ട്രക്ട് എടുത്ത് നിര്‍മ്മാണ ജോലികള്‍ നടത്തുന്നുണ്ട്. കുടിയിറക്കപ്പെട്ടവര്‍ക്കും, പ്രദേശവാസികള്‍ക്കും തൊഴില്‍ ലഭിക്കുന്നതുവരെ സമരം തുടരാനാണ് ബിഎംഎസിന്റെ തീരുമാനം.
