ചിങ്ങവനം: കാര്‍ നിയന്ത്രണം വിട്ട് മതിലില്‍ഇടിച്ച് വിദ്യാര്‍ത്ഥി മരിച്ചു. സുഹൃത്തിനു ഗുരുതരമായി പരിക്കേറ്റു. തുരുത്തി മിഷന്‍പള്ളിക്കു സമീപം തൂമ്പുങ്കല്‍ ജോയിച്ചന്റെ മകന്‍ അലോഷ്യസ് ടി.ജോയി (തോമസുകുട്ടി-23) ആണ് മരിച്ചത്. സമീപവാസിയും സുഹൃത്തുമായ പതിയില്‍ തോമസിന്റെ മകന്‍ ടിന്‍സ് തോമസ് (23) നാണ് പരിക്കേറ്റത്. മരണമടഞ്ഞ അലോഷ്യസ് ചങ്ങനാശേരി എസ്.ബി കോളേജില്‍ അവസാന വര്‍ഷ ബി.കോം വിദ്യാര്‍ത്ഥിയാണ്.
തിങ്കളാഴ്ച രാത്രി 11.30ന് എം.സി റോഡില്‍ വാഴപ്പള്ളി സെന്റ് തെരേസാസ് സ്‌കൂളിനു സമീപമാണ് അപകടം. ചങ്ങനാശേരിയില്‍ നിന്നും തുരുത്തിയിലുള്ള വീട്ടിലേക്കു വരുമ്പോള്‍ ഇവരുടെ കാര്‍ നിയന്ത്രണം വിട്ടു വൈദ്യുതി പോസ്റ്റിലും തുടര്‍ന്നു മതിലിലും ഇടിക്കുകയായിരുന്നു.
ഇടിയുടെ ആഘാതത്തില്‍ കാറും മതിലും പൂര്‍ണമായും തകര്‍ന്നു. അപകടത്തിനുശേഷം കാറിനുള്ളില്‍പെട്ട് ഇവര്‍ ഏതാനും സമയം ആളുകളുടെ ശ്രദ്ധയില്‍പ്പെടാതെ റോഡില്‍ കിടന്നു. തുരുത്തിയിലെ ബന്ധുവീട്ടില്‍ പോയി കാറില്‍ മടങ്ങുകയായിരുന്ന ചങ്ങനാശേരി മുളവന ബിജോയിയാണ് കാര്‍ അപകടത്തില്‍പ്പെട്ടുകിടക്കുന്നതു കണ്ടത്. ബിജോയി ആളുകളെ വിളിച്ചു കൂട്ടിയാണ് ഇരുവരെയും കാറില്‍ നിന്നെടുത്ത് ചങ്ങനാശേരി ജനറല്‍ ആശുപത്രിയിലെത്തിച്ചെങ്കിലും തലയ്‌ക്ക് ഗുരുതരമായി പരിക്കേറ്റ അലോഷ്യസിന്റെ ജീവന്‍ രക്ഷിക്കാനായില്ല. ഗുരുതരമായി പരിക്കേറ്റ സുഹൃത്തും സമീപവാസിയുമായ പതിയില്‍ തോമസിന്റെ മകന്‍ ടിന്‍സ് കോട്ടയം മെഡിക്കല്‍ കോളേജ് ആശുപത്രി ഐ.സി.യുവില്‍ പ്രവേശിപ്പിച്ചിരിക്കുകയാണ്.
അലോഷ്യസിന്റെ മൃതദേഹം കോട്ടയം മെഡിക്കല്‍ കോളേജില്‍ പോസ്റ്റുമോര്‍ട്ടത്തിനുശേഷം ബുധനാഴ്ച മൂന്ന് മണിക്ക് ഗുരുത്തി സെന്റ് മേരീസ് ചര്‍ച്ച് സെമിത്തേരിയില്‍ സംസ്‌കരിക്കും. മാതാവ് അശ്വതി ജോയി (ഇറ്റലി) സഹോദരങ്ങള്‍: ടോണി ജോയി (ഇറ്റലി), ഏവീസ് മരിയ ജോയി (ഇറ്റലി).
