കരുനാഗപ്പള്ളി: ദക്ഷിണകാശി എന്നറിയപ്പെടുന്ന ഓച്ചിറ പരബ്രഹ്മക്ഷേത്ര സന്നിധിയില് പന്ത്രണ്ടുവിളക്ക് മഹോത്സവത്തിന് ഇന്ന് തിരിതെളിയും. രാവിലെ 6.30ന് ക്ഷേത്രം പ്രസിഡന്റ് വി.പി.എസ്.മേനോന് പതാക ഉയര്ത്തും.
വൈകിട്ട് 5ന് നടക്കുന്ന സമാരംഭസമ്മേളനം ഹൈക്കോടതി ജഡ്ജ് ജസ്റ്റിസ് എ.വി.രാമകൃഷ്ണപിള്ള ഉദ്ഘാടനം ചെയ്യും. സി. ദിവാകരന് എംഎല്എ അദ്ധ്യക്ഷത വഹിക്കും.
പന്ത്രണ്ട് ദിവസം നീളുന്ന ഓച്ചിറ ഭജനമിരിപ്പിനായി നാടിന്റെ നാനാഭാഗങ്ങളില് നിന്നായി വ്രതനിഷ്ഠരായ ഭക്തജനങ്ങള് ഇന്നലെതന്നെ ക്ഷേത്രസന്നിധിയില് എത്തി. ഉത്സവദിവസങ്ങളില് നടക്കുന്ന വിവിധ സമ്മേളനങ്ങളില് ആദ്ധ്യത്മിക സാംസ്കാരിക രംഗങ്ങളിലെ പ്രമുഖര് പങ്കെടുക്കും. പന്ത്രണ്ടുവിളക്ക് മഹോത്സവത്തിനായുള്ള എല്ലാ ഒരുക്കങ്ങളും പൂര്ത്തിയായതായി ഭരണസമിതി പ്രസിഡന്റ് വി.വി.എസ് മേനോനും സെക്രട്ടറി വി.സദാശിവനും അറിയിച്ചു.
ഭക്തജനങ്ങള്ക്ക് വിരി വയ്ക്കുവാന് ആയിരത്തോളം കുടിലുകള് സജ്ജമായിക്കഴിഞ്ഞു. കൂടാതെ ഓംകാര സത്രം, പഴയസത്രം, അതിഥിമന്ദിരം എന്നിവിടങ്ങളില് 150ഓളം ഭജനമുറികളും തയ്യാറാക്കിയിട്ടുണ്ട്. 150 ശൗചാലയങ്ങളും അറുപത് കുളിമുറികളും പ്രവര്ത്തന സജ്ജമാണ്. കൂടാതെ പത്ത് കുടിലുകള്ക്ക് ഒന്നുവീതം കണക്കാക്കി കുടിവെള്ള ടാപ്പുകളും തയ്യാറാക്കിയിട്ടുണ്ട്. 24 മണിക്കൂറും ജലവിതരണത്തിനുള്ള സംവിധാനം ജലഅതോറിറ്റിയുടെ സഹകരണത്തോടെ ഏര്പ്പെടുത്തിയിട്ടുണ്ട്.
മാലിന്യസംസ്കരണപ്ലാന്റ് തയ്യാറാക്കുകയും കുറ്റമറ്റ രീതിയില് സീവേജ് പ്ലാന്റ് ഒരുക്കുകയും ചെയ്തിട്ടുണ്ട്. കുടിലുകളില്നിന്നും വ്യാപാരസ്ഥാപനങ്ങളില് നിന്നുമുള്ള മാലിന്യങ്ങള് നീക്കം ചെയ്യാനുള്ള പ്രത്യേകസംവിധാനവും പടനിലത്ത് ഒരുക്കിയിട്ടുണ്ട്. ഭക്തര്ക്ക് ആവശ്യത്തിന് ചികിത്സാസഹായം ലഭ്യമാക്കാന് സാമൂഹികാരോഗ്യകേന്ദ്രത്തിന്റെയും ഓച്ചിറ പരബ്രഹ്മ സൂപ്പര്സ്പെഷ്യാലിറ്റി ആശുപത്രിയുടെയും നേതൃത്വത്തില് വേണ്ട സൗകര്യങ്ങള് ഒരുക്കിയിട്ടുണ്ട്. കൂടാതെ ഹോമിയോ, ആയുര്വേദ ആശുപത്രികളും സജ്ജീകരിച്ചിട്ടുണ്ട്. അക്രമങ്ങളും മോഷണവും സാമൂഹികവിരുദ്ധ ശല്യവും തടയാന് സിസിടിവി ക്യാമറ സ്ഥാപിച്ചിട്ടുണ്ട്. ശക്തമായ പോലീസ് സംവിധാനവും ഓച്ചിറ പോലീസിന്റെ നേതൃത്വത്തില് ഒരുക്കിയിട്ടുണ്ട്. മുന്കാലങ്ങളിലെ പോലെ വൃശ്ചികോത്സവദിനങ്ങളിലെ പരിപാടികള്ക്ക് സജ്ജീകരണങ്ങള് പൂര്ത്തിയായിട്ടുണ്ട്. ഇന്നുരാത്രി 8ന് സംഗീതക്കച്ചേരി. 10ന് കഥകളി എന്നിവ നടക്കും. നാളെ വൈകിട്ട് 3ന് വ്യവസായ സമ്മേളനം. ബിജെപി സംസ്ഥാന ഉപാദ്ധ്യക്ഷന് എം.ടി. രമേശ് അദ്ധ്യക്ഷത വഹിക്കും. എസ്എന്ഡിപി യോഗം ജനറല് സെക്രട്ടറി വെള്ളാപ്പള്ളി നടേശന് ഉദ്ഘാടനം ചെയ്യും. കെ.എന്. ബാലഗോപാല് എംപി, കെ.സി.രാജന്, വി.രവികുമാര്, അനില് കുറുങ്ങപ്പള്ളി എന്നിവര് സംസാരിക്കും. തുടര്ന്ന് നൃത്തസന്ധ്യ, സംഗീതക്കച്ചേരി.
പന്ത്രണ്ടാംദിവസം സമാപനസമ്മേളനത്തില് സി.കെ.സദാശിവന് എംഎല്എ അദ്ധ്യക്ഷത വഹിക്കും. എന്എസ്എസ് പ്രസിഡന്റ് അഡ്വ.പി.എന്.നരേന്ദ്രനാഥന് നായര് ഉദ്ഘാടനം നിര്വഹിക്കും. ദേവസ്വം ബോര്ഡ് പ്രസിഡന്റ് പ്രയാര് ഗോപാലകൃഷ്ണന് മുഖ്യപ്രഭാഷണം നടത്തും. അഡ്വ.എന്.വി. അയ്യപ്പന്പിള്ള, അഡ്വ.കെ.ഗോപിനാഥന്, വി.പി.എസ്.മേനോന്, കെ.രാധാകൃഷ്ണന് എന്നിവര് സംസാരിക്കും.
