വൈക്കം : വിദ്യാര്ത്ഥികളുടെ പ്രകടനമികവില് ഏവരെയും അതിശയിപ്പിക്കുന്ന കാഴ്ചകളാണ് മൂന്ന് ദിവസമായി വൈക്കത്ത് നടന്ന കോട്ടയം റവന്യു ജില്ലാ ശാസ്ത്ര-ഗണിതശാസ്ത്ര, സാമൂഹ്യശാസ്ത്ര-ഐ.ടി പ്രവൃത്തിപരിചയമേളകളില് അരങ്ങേറിയത്. ആശ്രമം സ്ക്കൂള്, സെന്റ് ലിറ്റില് തെരേസാസ് ഗേള്സ് ഹയര് സെക്കന്ററി സ്ക്കൂള്, ഗവണ്മെന്റ് ബോയ്സ് ഹയര് സെക്കന്ററി സ്ക്കൂള് എന്നിവിടങ്ങളിലാണ് മത്സരങ്ങള് അരങ്ങേറിയത്. എല്.പി, യു.പി, ഹൈസ്ക്കൂള്, ഹയര് സെക്കന്ററി എന്നി വിഭാഗങ്ങളിലായി ആയിരത്തിലധികം വിദ്യാര്ത്ഥികള് മേളയില് പങ്കെടുത്തു. ജില്ലയിലെ 13 ഉപജില്ലകളിലെ വിദ്യാര്ത്ഥികളാണ് മത്സരത്തിന് എത്തിയത്.
മൂന്നാം ക്ലാസുകാരന്റെ വിരുതില് കള്ളനെ കുരുക്കാന് വൈദ്യുതി കൊണ്ട് ബള്ബില് കെണിയൊരുക്കുന്ന വിദ്യ ആരെയും അതിശയിപ്പിച്ചു. സന്ധ്യ മയങ്ങിയാല് അപരിചിതര് വീട്ടിലെത്തിയാല് വയറിലെ സ്പര്ശനം കൊണ്ട് ബള്ബ് മിന്നിത്തെളിയുമെന്ന് മൂന്നാം ക്ലാസുകാരന് അലന് കുര്യന് സാക്ഷ്യപ്പെടുത്തുന്നു. ആര്പ്പൂക്കര മണിയാപറമ്പ് എസ്.എന്.ഡി.പി എല്.പി സ്ക്കൂളിലെ വിദ്യാര്ത്ഥിയാണ് അലന്. ഇലക്ട്രിക് മേഖലയില് പണിയെടുക്കുന്ന പിതാവ് കുര്യനില് നിന്നാണ് അലന് ഇലക്ട്രിക് പണികള് കരസ്ഥമാക്കിയത്.
ചിത്രരചന മത്സരത്തില് നിറഞ്ഞത് ശ്രീകൃഷ്ണനും ദമയന്തിയുമാണ്. തുണിയില് ചിത്രങ്ങള് വരക്കുന്ന മത്സരത്തില് താരമായത് ഏറ്റുമാനൂര് ശ്രീവിദ്യാധിരാജ സ്ക്കൂളിലെ എട്ടാം ക്ലാസ് വിദ്യാര്ത്ഥിനി ഖദീജ മുഹമ്മദാണ്. ഖദീജയുടെ കരവിരുതില് ശ്രീകൃഷ്ണന് വിരിഞ്ഞപ്പോള് സദസ്സ് ഒന്നാകെ കൈയ്യടിച്ചു. ഹംസദമയന്തിയെ വരച്ച് വാഴപ്പള്ളി സെന്റ് തെരേസാസ് സ്ക്കൂളിലെ പ്ലസ് വണ് വിദ്യാര്ത്ഥിനി നിമിഷയും, കുറുമ്പനാട് സെന്റ് പീറ്റേഴ്സ് സ്ക്കൂളിലെ പ്ലസ് ടു വിദ്യാര്ത്ഥിനി ഗായത്രിയുമെല്ലാം മികച്ച പ്രകടനമാണ് കാഴ്ച വെച്ചത്.
ലോഹക്കട്ടകളെ നിമിഷനേരം കൊണ്ടാണ് വിദ്യാര്ത്ഥികള് ഉപകരണങ്ങളാക്കി തീര്ത്തത്. ഹൈസ്ക്കൂള് വിദ്യാര്ത്ഥികളെപ്പോലും കടത്തിവെട്ടുന്ന പ്രകടനമാണ് യു.പി തലത്തില് നടന്നത്. ഇവര് ലോഹക്കട്ടകളെ തൊട്ടിയും കുറ്റിയടപ്പും കണ്ണാപ്പയും തവിയും കത്തിയും വാളുമെല്ലാമാക്കി മാറ്റി. മത്സരത്തില് പോയിന്റിടാനെത്തിയ അധ്യാപകര് പോലും മാര്ക്ക് നല്കുന്ന കാര്യത്തില് ഏറെ ബുദ്ധിമുട്ടി.
മേളയുടെ അവസാനദിവസം ഏറ്റവും ശ്രദ്ധേയമായത് പാവകളിക്കുവേണ്ടിയുള്ള കുട്ടികളുടെ പാവനിര്മാണ മത്സരമായിരുന്നു. പ്ലാസ്റ്റര് ഓഫ് പാരിസിനെ കുഴച്ച് ശില്പങ്ങളാക്കുന്ന മോള്ഡിംഗ് മത്സരത്തില് ഭരണങ്ങാനത്തുകാരുടെ മുന്നേറ്റമായിരുന്നു. ഭരണങ്ങാനം സെന്റ് മേരീസ് സ്ക്കൂളിലെ പ്ലസ് ടു വിദ്യാര്ത്ഥി ജോയിഷും പത്താം ക്ലാസ് വിദ്യാര്ത്ഥി എബിന്രാജുമാണ് മികവുറ്റ പ്രകടനം കൊണ്ട് ശ്രദ്ധേയരായത്. ബുദ്ധനും ശിവനും ശ്രീകൃഷ്ണനുമെല്ലാം ഇവരുടെ കരവിരുതില് വിരിഞ്ഞു.
