കാഞ്ഞിരപ്പള്ളി: ദേശീയ പാതയോരത്തെ ഓടകള് പുനസ്ഥാപിക്കണമെന്ന് ആവശ്യം ശക്തമായി. പലയിടങ്ങളിലും പാതയോരത്ത് നിര്മ്മിച്ചിരുന്ന ഓടകള് അപ്രത്യക്ഷമായി. മിക്കസ്ഥലങ്ങളിലും ഓടകളില് മണ്ണും കല്ലും ചെളിയും നിറഞ്ഞ് വെള്ളമൊഴുക്ക് നിലച്ച നിലയിലാണ്. മൂടിയ ഓടകള് കൈയ്യേറിയ സ്ഥലങ്ങളുമുണ്ട്. ഓടകളില്ലാത്തതിനാല് മഴ പെയ്യുമ്പോള് വെള്ളം റോഡിലേക്കിറങ്ങി ഒഴുകുന്നതും റോഡില് കെട്ടികിടക്കുന്നതും യാത്രക്കാര്ക്കും വാഹനങ്ങള്ക്കും ദുരിതമായിരിക്കുകയാണ്. മഴവെള്ളത്തിനൊപ്പം മലിനജലവും കെട്ടികിടക്കുന്നത് പരിസരവാസികള്ക്കും ദുരിതമായി.
കാഞ്ഞിരപ്പള്ളി പേട്ട സകൂള് ഭാഗം മുതല് പൂതക്കുഴി വരെയുള്ള ഭാഗത്താണ് ഓടകള് മൂടപ്പെട്ടിരിക്കുന്നതും മലിന ജലം റോഡിലേക്ക് കയറി ഒഴുകുന്നതും. ഇരുചക്ര വാഹനങ്ങള് വെള്ളക്കെട്ടില് വീണ് അപകടങ്ങളും പതിവാണ്.
സ്കൂള് കുട്ടികളടക്കുമുള്ള കാല്നട യാത്രികര്ക്ക് നടന്നു പോകുമ്പോള് ചെളിയഭിഷേകവും ഉറപ്പാണ്. പൂതക്കുഴി ഭാഗത്തെ ഓടകള് പുനസ്ഥാപിക്കണമെന്നും, പാതയോരത്ത് നടപ്പാതകള് നിര്മ്മിക്കണമെന്നും ആവശ്യപ്പെട്ട് നാട്ടുകാര് അധികാരികള്ക്ക് നിവേദനം നല്കിയിട്ടും പ്രയോജനമുണ്ടായില്ലെന്ന് ആരോപണമുണ്ട്.
