വനിതാ സ്ഥാനാര്‍ഥിയെ അപമാനിച്ച സംഭവം: എട്ട് മുസ്്‌ലിം ലീഗ് പ്രവര്‍ത്തകരെ അറസ്റ്റ്‌ചെയ്ത് ജാമ്യത്തില്‍വിട്ടു

കണ്ണൂര്‍: തെരഞ്ഞെടുപ്പില്‍ പരാജയപ്പെട്ട വനിതാ സ്ഥാനാര്‍ഥിയെ അപമാനിച്ച് ആഹ്ലാദപ്രകടനം നടത്തിയ സംഭവത്തില്‍ എട്ട് മുസ്‌ലിംലീഗ് പ്രവര്‍ത്തകരെ അറസ്റ്റ് ചെയ്ത് ജാമ്യത്തില്‍ വിട്ടു. മടക്കര തെക്കുഭാഗം ബദര്‍ പള്ളിക്കു സമീപം തോലന്‍ ഷബീര്‍(28), ഇരിണാവ് ഡാമിനു സമീപത്തെ അവറാന്‍ സക്കറിയ(26), ഹരിജന്‍ വായനശാലയ്‌ക്കു സമീപത്തെ ടി.എം.വി.അബ്്ദുല്‍ നിസാര്‍(40), ഇട്ടമ്മല്‍ മഹ്്‌റൂഫ്(30), പടപ്പയില്‍ റഫീഖ്(32), പി.പി.നൗഷാദ്(31), കൊവ്വമ്മല്‍ ഇസ്മായീല്‍(34), മടക്കര ജിഎംഎല്‍പി സ്‌കൂളിനു പിന്‍വശത്തെ മടത്തിലെ വളപ്പില്‍ സലീം(30) എന്നിവരെയാണ് വളപട്ടണം സിഐ അറസ്റ്റ് ചെയ്തത്. ഇവര്‍ക്കെതിരായ വകുപ്പുകള്‍ സ്‌റ്റേഷന്‍ ജാമ്യം നല്‍കാന്‍ കഴിയുന്നതായതിനാലാണ് ജാമ്യം നല്‍കുന്നതെന്ന് സിഐ പറഞ്ഞു. തിരഞ്ഞെടുപ്പ് ഫലപ്രഖ്യാപനത്തിനിടെയാണ് മാട്ടൂല്‍ പഞ്ചായത്തിലെ മടക്കര ഈസ്റ്റ് വാര്‍ഡില്‍ മുസ്‌ലിംലീഗ് പ്രവര്‍ത്തകര്‍ ആഭാസകരമായ രീതിയില്‍ പ്രകടനം നടത്തിയത്. പ്രകടനത്തിനു മുന്നോടിയായി, സ്ത്രീ വേഷം ധരിച്ച യുവാവിനെ മടക്കര ശാഖാ മുസ്‌ലിംലീഗ് ഓഫിസായ സിഎച്ച് സൗധത്തിനു മുന്നില്‍വച്ച് കയറിപ്പിടിക്കുകയും സ്ഥാനാര്‍ഥിയുടെ പേരുപറഞ്ഞ് ലൈംഗികച്ചുവയോടെ സംസാരിക്കുകയും ചേഷ്ടകള്‍ കാണിക്കുകയുമായിരുന്നു. സംഭവം വിവാദമായതോടെ ജില്ലാ പോലിസ് ചീഫും കലക്ടറും വനിതാ കമ്മീഷനും ഇടപെടുകയും കേസെടുക്കുകയുമായിരുന്നു. എന്നാല്‍ നിസ്സാരവകുപ്പുകള്‍ പ്രകാരം കേസെടുത്ത് അട്ടിമറിക്കാന്‍ ശ്രമം നടക്കുന്നതായി ആരോപണമുയരുന്നതിനിടെയാണ് പ്രതികളെ സ്‌റ്റേഷന്‍ ജാമ്യം നല്‍കി വിട്ടയച്ചത്. സംഭവത്തില്‍ മഹല്ല് പ്രസിഡന്റ് കൂടിയായ ലീഗ് മടക്കര ശാഖ മുസ്്‌ലിംലീഗ് ഖജാന്‍ജി മുഹമ്മദ് കുഞ്ഞി, ഒ.കെ.മൊയ്തീന്‍, പി.വി.സക്കറിയ, പത്താല ഹംസ, ഇട്ടമ്മല്‍ സജീര്‍, സലഫി പള്ളിക്കു പിന്നിലെ ഇട്ടമ്മല്‍ റാസിഖ് എന്നിവരെകൂടി പിടികൂടാനുണ്ട്. അതേസമയം, ആഭാസകരമായ പ്രകടനം നടത്തിയതിനു പാര്‍ട്ടിയുമായി ബന്ധമില്ലെന്നും ഉത്തരവാദികളായവരെയെല്ലാം സസ്‌പെന്‍ഡ് ചെയ്തതായി മുസ്്‌ലിം ലീഗ് സംസ്ഥാന ജനറല്‍ സെക്രട്ടറി ഇ.ടി.മുഹമ്മദ് ബഷീര്‍ അറിയിച്ചിരുന്നു.