കണ്ണൂര്: ലോകത്തിന്റെ തന്നെ മതാപിതാക്കളായ പാര്വ്വതീ പരമേശ്വരന്മാര് നെടുമാംഗല്യത്തിനും സര്വ്വൈശ്വര്യത്തിനും വേണ്ടി നടത്തിയ മഹായജ്ഞമായ ദമ്പതീ സമാരാധനയും രുദ്രകാമേഷ്ഠിയജ്ഞവും 2016 ജനുവരി 16ന് കാലത്ത് 6 മണി മുതല് ചൊവ്വ മഹാശിവക്ഷേത്രത്തില് നടക്കും. സര്വ്വ ഐശ്വര്യത്തിനും സര്വ്വാഭീഷ്ട സിദ്ധിക്കും, വിവാഹ തടസ്സങ്ങള് മാറിക്കിട്ടാനും, സര്വ്വ വിഘ്ന നിവാരണത്തിനും, ആയുരാരോഗ്യ സൗഖ്യത്തിനും വേണ്ടി നടത്തുന്ന യജ്ഞമാണ് ദമ്പതീ സമാരാധനയും രുദ്രകാമേഷ്ടി യജ്ഞവും. മലബാറില് ആദ്യമായിട്ടാണ് ഈ മഹായജ്ഞം നടക്കുന്നത്.
ക്ഷേത്രം തന്ത്രി തെക്കിനിയേടത്ത് തരണനെല്ലൂര് പത്മനാഭനുണ്ണി നമ്പൂതരിപ്പാടിന്റെ അനുഗ്രഹാശിസ്സുകളോടെ കൊട്ടാരം ഇല്ലത്ത് ജയരാമന് നമ്പൂതിരിപ്പാടിന്റെ സാന്നിധ്യത്തില് പ്രശസ്ത താന്ത്രികാചാര്യന് ആലച്ചേരി ഹരികൃഷ്ണന് നമ്പൂതിരിപ്പാടിന്റെ മുഖ്യ കാര്മ്മികത്വത്തിലാണ് ഈ മഹാ ജയജ്ഞം നടക്കുന്നത്.
