കോഴിക്കോട്: 35 വര്ഷം താമസിച്ചു വന്ന വീട്ടിലേക്കുള്ള നടവഴി കെട്ടിയടച്ചതിനാല് വാടകവീട്ടില് താമസിക്കുകയാണ് പട്ടികജാതിക്കാരനായ വേലായുധനും കുടുംബവും. കുരുവട്ടൂര് ഗ്രാമപഞ്ചായത്തില് പോലൂരില് പൊറ്റമ്മല് വീട്ടില് വേലായുധനും ഒമ്പതംഗ കുടുംബത്തിനുമാണ് ഈ ദുര്ഗതി.
താന് വിശ്വസിക്കുന്ന പാര്ട്ടിയും തന്നെ വഞ്ചിച്ച വേദനയിലാണ് വേലായുധന്. സിപിഎം നേതൃത്വത്തിനു മുമ്പില് പ്രശ്നം അവതരിപ്പിച്ചപ്പോള് ലഭിച്ച മറുപടി അഞ്ച് ലക്ഷം രൂപ നല്കാനായിരുന്നു. പണക്കാര്ക്ക് മുകളില് പാര്ട്ടി കൊടിയും പറക്കില്ലെന്ന് വേലായുധന് തിരിച്ചറിയുന്നു.
ആറ് വര്ഷം മുമ്പ് അയല്പക്കത്ത് താമസമാക്കിയ അയല്ക്കാരനും സിപിഎം കുടുംബമാണ് തന്റെ നടവഴി അടച്ചതെന്ന് വേലായുധന് വാര്ത്താസമ്മേളനത്തില് പറഞ്ഞു. ഇവര് താമസമാക്കിയ സമയം മുതല് നടവഴി അടക്കാന് പല വിധത്തില് ശ്രമിച്ചിരുന്നു. ഇടത് കൈയില്ലാത്ത വേലായുധനും കുടുംബവും ഇതെല്ലാം സഹിച്ചു.
ജാതിപ്പേര് വിളിച്ച് അധിക്ഷേപിക്കുന്നതും പതിവായിരുന്നു. 2011ല് ചേവായൂര് പോലീസില് പരാതി നല്കിയതിനെ തുടര്ന്നാണ് പ്രശ്നം കോടതിയിലെത്തിയത്. കോടതി നിയോഗിച്ച അഡ്വക്കറ്റ് കമ്മീഷന്റെ ചില തെറ്റായ റിപ്പോര്ട്ടുകള് കാരണം ഉപയോഗിച്ചുകൊണ്ടിരുന്ന നടവഴി അടക്കാന് അയല്ക്കാര്ക്ക് സാധിച്ചുവെന്ന് വേലായുധന് നിയമസഹായ കര്മ്മസമിതി ആരോപിച്ചു.
വേലായുധന് 35 വര്ഷമായി ഉപയോഗിച്ചുകൊണ്ടിരിക്കുന്ന വഴി കെട്ടി അടച്ചതിനാല് വീട്ടുകാര്ക്ക് പുറത്തിറങ്ങാന് നിര്വാഹമില്ലെന്ന് വില്ലേജ് ഓഫീസര് സ്ഥലം സന്ദര്ശിച്ച് 2015 മാര്ച്ച് 17ന് റിപ്പോര്ട്ട് നല്കിയിരുന്നു.
വലിയ വാടകയും അഡ്വാന്സും നല്കിയാണ് ഇപ്പോള് ഒമ്പതംഗ കുടുംബം വാടകവീട്ടില് കഴിയുന്നത്. മക്കള് ഡിവൈഎഫ് പ്രവര്ത്തകരാണെങ്കിലും സിപിഎമ്മും ഡിവൈഎഫ്ഐയും തങ്ങളുടെ ദുരിതം കാണുന്നില്ലെന്ന് വേലായുധന് പറഞ്ഞു. പ്രശ്നം കോണ്ഗ്രസുകാരുടെ മുമ്പില് അവതരിപ്പിച്ചപ്പോള് നഗരത്തിലുള്ള താന് നിയന്ത്രിക്കുന്ന സഹകരണബാങ്കില് അഞ്ച് ലക്ഷം രൂപ ഡിപ്പോസിറ്റ് ചെയ്താല് പ്രശ്നം പരിഹരിച്ചു തരാമെന്നാണ് പ്രമുഖ കോണ്ഗ്രസ് നേതാവ് പറഞ്ഞത്.
പണം നല്കാന് വഴിയില്ലാതെ പാര്ട്ടിതമ്പ്രാക്കന്മാര്ക്കു മുമ്പില് നിസ്സഹായനാകുകയാണ് വേലായുധന്. വേലായുധന്റെയും കുടുംബത്തിന്റെ ദയനീയ സ്ഥിതി അറിഞ്ഞ സുഹൃത്തുക്കളും നാട്ടുകാരും നിയമസഹായസമിതി രൂപീകരിച്ചിരിക്കുകയാണ്. എം.എം. ശ്രീധരന് ചെയര്മാനും ബി. രാഘവന് കണ്വീനറുമാണ്.
