മട്ടാഞ്ചേരി: കോര്‍പ്പറേഷന്‍ കൗണ്‍സില്‍ തെരഞ്ഞെടുപ്പില്‍ ബിജെപി സ്ഥാനാര്‍ത്ഥികള്‍ പ്രചാരണ മുന്നേറ്റം പ്രകടമാക്കിക്കഴിഞ്ഞു. പശ്ചിമകൊച്ചിയില്‍ യുവജന സംഘങ്ങളുടെ സജീവ കൂട്ടായ്‌മയില്‍ വിവിധ തല പ്രചാരണങ്ങളാണ് ബിജെപി പ്രകടമാക്കുന്നത്. ഗൃഹ സമ്പര്‍ക്കം, പ്രകടനങ്ങള്‍. വികസന സന്ദേശങ്ങളുമായുള്ള അപ്പീലുകള്‍ തുടങ്ങിയവയ്‌ക്കൊപ്പം കേന്ദ്ര സര്‍ക്കാരിന്റെ ഒന്നര വര്‍ഷത്തെ പുതിയ പദ്ധതികള്‍, നയനേട്ടങ്ങള്‍ തുടങ്ങിയവയും പ്രചാരണത്തിലുള്‍പ്പെടുത്തിയിട്ടുണ്ട്.
ആധുനിക സംവിധാനങ്ങളായ വാട്ട്സ്സ് അപ്പ്, ഫേയ്‌സ്ബുക്ക് ‘മെസേജീങ്ങ് തുടങ്ങിയവയും പ്രയോജനപ്പെടുത്തുന്നുണ്ട്. ഓരോ ഡിവിഷനിലും തനത് പ്രാധാന്യം തിരിച്ചറിഞ്ഞു കൊണ്ടുള്ള ജനകീയ വിഷയങ്ങളുയര്‍ത്തി പ്രശ്‌ന പരിഹാരവുമായി സ്ഥാനാര്‍ത്ഥികള്‍ നടത്തുന്ന ഗൃഹസന്ദര്‍ശനം ഏറെ സ്വീകാര്യതയാണ് ജനഹൃദയങ്ങളിലുണ്ടാക്കുന്നത്. ആനുകാലികവും വിവാദങ്ങളും വികസന വിഷയങ്ങളിലെ കാഴ്ചപ്പാടുകളും പരിഹാര നിര്‍ദേശങ്ങളും വിവിധ സംഘടനകള്‍ നടത്തുന്ന സ്ഥാനാര്‍ത്ഥി സംഗമങ്ങളും ബിജെപിയുടെ സ്വീകാര്യത വളര്‍ത്തുവാനുമിടയാക്കുന്നു. പ്രധാനമന്ത്രി നരേന്ദ്ര മോദിയുടെ ഉജ്വല പ്രതിഛായ ന്യൂനപക്ഷ മതസമുദായ വോട്ടര്‍മാര്‍ക്കിടയില്‍ തരംഗം സൃഷ്ടിക്കുമ്പോള്‍ ബിജെപിയുടെ സ്ഥാനാര്‍ത്ഥികള്‍ക്ക് ഏറെ ആത്മവിശ്വാസവും പകരുന്നു. മാറിയ രാഷ്‌ട്രീയസാമൂഹ്യ മാറ്റങ്ങളില്‍ഇടതുവലതു മുന്നണികള്‍ ആശങ്കയുണര്‍ത്തുമ്പോള്‍ പശ്ചിമകൊച്ചിയില്‍ ശക്തമായ മുന്നേറ്റമാണ് തെരഞ്ഞെടുപ്പരംഗത്ത് ബിജെപിയുടെ നേട്ടം.
