കോതമംഗലം: കന്നിയങ്കത്തില് സിപിഎംന്റെ ഉരുക്ക് കോട്ട തകര്ത്ത് വാരപ്പെട്ടിയില് 9-ാം വാര്ഡില് നിന്ന് വന്ഭൂരിപക്ഷത്തോടെ വിജയിച്ച ബിജെപിയുടെ പ്രിയസന്തോഷ് രണ്ടാമൂഴം തേടി ജനവിധി തേടുന്നു. യുഡിഎഫിന് മൃഗീയ ഭൂരിപക്ഷമുണ്ടായിരുന്ന കഴിഞ്ഞ ഭരണസമിതിയില് പഞ്ചായത്തില് നിന്നുള്ള വിഹിതം തന്റേതായ തനതുശൈലിയിലൂടെ കണക്ക് പറഞ്ഞ് വാങ്ങി വാര്ഡിന്റെ വികസനത്തിനായി ഉപയോഗിച്ചതിന്റെ ആത്മവിശ്വാസത്തില് വാര്ഡ് ജനറലായിട്ടും രണ്ടാംമൂഴം ജനങ്ങളെ സമീപിക്കുകയാണ്.
അഞ്ച് വര്ഷംമുമ്പ് ബിജെപിക്ക് കേവലം 65അംഗങ്ങളാണ് വാര്ഡില് ഉണ്ടായിരുന്നത്. കാലങ്ങളായി സിപിഎം സ്ഥാനാര്ത്ഥികളാണ് വാര്ഡില് ജയിച്ചുപോന്നിട്ടുള്ളത്. വരുടെ ഭരണകാലത്ത് റോഡുകള് എല്ലാം തകര്ന്ന് സഞ്ചാരയോഗ്യമല്ലാത്ത അവസ്ഥയിലായിരുന്നു. കഴിഞ്ഞ അഞ്ച് വര്ഷത്തിനിടയില് നിരവധി കാര്യങ്ങള് വാര്ഡില് ചെയ്യാന് പ്രിയയ്ക്ക് സാധിച്ചു.
വാര്ഡിലെ ഏറെനാളത്തെ ജനങ്ങളുടെ സ്വപ്നമായിരുന്ന അംഗന്വാടിക്ക് സ്വന്തമായി സ്ഥലവും കെട്ടിടവും 11ലക്ഷം രൂപ ചെലവില് നിര്മ്മിച്ചതുള്പ്പെടെ ഏകദേശം ഒരുകോടിയോളം രൂപയുടെ വികസനപ്രവര്ത്തനങ്ങള് നടത്തി. കഴിഞ്ഞതവണ തെരഞ്ഞെടുപ്പ് സമയത്ത് പ്രകടനപത്രികയില് പറഞ്ഞിരുന്ന എല്ലാകാര്യങ്ങളും നടപ്പിലാക്കി. ഇപ്പോള് വാര്ഡില് പ്രിയ ജനങ്ങളുടെ പ്രിയങ്കരിയാണ്. ചിട്ടയായ തെരഞ്ഞെടുപ്പ് പ്രവര്ത്തനം ഓരോദിവസവും സൂക്ഷമമായി വിലയിരുത്തി പോരായ്മകള് പരിഹരിച്ചുകൊണ്ട് തുടക്കം മുതല് ഒടുക്കംവരെ ഒരുപറ്റം യുവാക്കളും അവര്ക്ക് മാര്ഗനിര്ദ്ദേശങ്ങള് നല്കി വാര്ഡിലെ ചില മുതിര്വ്യക്തികളും ബിജെപി നിയോജകമണ്ഡലം കമ്മറ്റിയില് തെരഞ്ഞെടുപ്പിന്റെ ആദ്യഘട്ടം മുതല് അവസാനഘട്ടം വരെ പ്രിയയുടെ വിജയം ഉറപ്പ് എന്ന ട്രെന്റ് നിലനിര്ത്തിയുള്ള പ്രവര്ത്തനശൈലിമൂലമാണ് കഴിഞ്ഞതവണ ശൂന്യതയില്നിന്ന് അത്ഭുതം സൃഷ്ടിച്ചചരിത്രവിജയം നേടാനായത്. അന്ന് വാര്ഡിലെ പലര്ക്കും അപരിചിതയായിരുന്ന പ്രിയ ഇന്ന് എല്ലാവര്ക്കും സുപരിചിതയാണെന്ന് മാത്രമല്ല, തങ്ങളുടെ ഏതാവശ്യത്തിനും പ്രിയകൂടെയുണ്ടെന്ന അനുഭവം ഇക്കുറിയും ജനങ്ങളെ മറിച്ച് ചിന്തിക്കാന് പ്രേരിപ്പിക്കില്ലെന്ന് വാര്ഡിലെ ഏതൊരാള്ക്കും ഉറപ്പാണ്. ഒന്നാംഘട്ട പ്രവര്ത്തനം വിലയിരുത്തുമ്പോള് ഇത്തവണ പ്രിയ റെക്കോര്ഡ് ഭൂരിപക്ഷത്തോടുകൂടി വിജയിക്കുമെന്ന് ഉറപ്പായിരിക്കുകയാണ്.
കഴിഞ്ഞതവണ 9-ാം വാര്ഡില് പ്രിയ ചെയ്ത വികസനപ്രവര്ത്തനങ്ങള് തൊട്ടടുത്ത വാര്ഡുകളായ 7,8വാര്ഡുകളേയും സ്വാധീനിച്ചിട്ടുണ്ടെന്നാണ് രാഷ്ട്രീയ നിരീക്ഷകര് വിലയിരുത്തുന്നത്. ഈ രണ്ട് വാര്ഡുകളിലും ബിജെപി വിജയം ഉറപ്പിച്ച് പ്രവര്ത്തനവുമായി മുന്നോട്ട്പോവുകയാണ്.
