പള്ളിക്കര: കുന്നത്തുനാട് ഗ്രാമപഞ്ചായത്തിലെ വിവിധ വാര്ഡുകളില് ഉദ്യോഗസ്ഥരുടേയും ചില തത്പരകക്ഷികളുടേയും രഹസ്യ അജണ്ടയ്ക്ക് കീഴില് തെരഞ്ഞെടുപ്പ് പെരുമാറ്റ ചട്ട ലംഖനം നടക്കുന്നതായി ബിജെപി. ബെനിഫിഷറി കമ്മറ്റികള് ഏറ്റെടുത്തിട്ടുള്ള നിര്മ്മാണ പുനഃരുദ്ധാരണ ജോലികളാണ് ചട്ടലംഘനത്തിലൂടെ നടപ്പാക്കാന് ശ്രമിക്കുന്നതെന്ന് ബിജെപി കുന്നത്തുനാട് ഇലക്ഷന് മാനേജ്മെന്റ് കമ്മറ്റി ജനറല് കണ്വീനര് ഇന്ചാര്ജ്ജ് പി.സി.കൃഷ്ണന് ആരോപിച്ചു. ചട്ടലംഘനം നിലവില് വന്നതിനുശേഷം ഉദ്യോഗസ്ഥരുടെ ഒത്താശയോടെ പഞ്ചായത്ത് രേഖകളില് കൃത്രിമം കാണിച്ച് തീയതി മുന്കൂട്ടി എഴുതിചേര്ത്താണ് എഗ്രിമെന്റ് ഉണ്ടാക്കിയതെന്നും അദ്ദേഹം ആരോപിച്ചു.
പുന്നോര്കോട് നാലാം വാര്ഡില് റോഡരികില് കോണ്ക്രീറ്റ് പണിയാണ് ചട്ടം ലംഘിച്ച് ഇന്നലെ ആരംഭിച്ചത്. 15-ാം വാര്ഡ് പിണര്മുണ്ട നടുമുകള് കോളനിയില് കഴിഞ്ഞദിവസം കോണ്ഗ്രസിന്റെ നിലവിലെ വാര്ഡ്മെമ്പര് കോഴികുഞ്ഞുങ്ങളെ ചട്ടംലംഘിച്ച് വിതരണം നടത്തി. ബിജെപി പ്രവര്ത്തകര് അറിഞ്ഞ്കേട്ടെത്തിയപ്പോള് നേതാവ് സ്ഥലംവിട്ടു. ബിജെപിയുടെ ശക്തമായ മുന്നേറ്റം കണ്ട് ഭയന്ന് ഇടത്-വലത് മുന്നണികള് സംയുക്തമായിട്ടാണ് ഇത്തരം ചട്ടലംഘനം നടത്തുന്നതെന്ന് ബിജെപി പഞ്ചായത്ത് സമിതി ജനറല് സെക്രട്ടറി പി.എ.ശശി ആരോപിച്ചു.
