വാഴൂര്: ത്രിതല പഞ്ചായത്ത് തിരഞ്ഞെടുപ്പിനുള്ള ബാലറ്റ് പേപ്പറുകളുടെ അച്ചടി വാഴൂര് ഗവണ്മെന്റ് പ്രസില് പൂര്ത്തിയാക്കി. ബാലറ്റുകള് പെട്ടിയിലാക്കി അതാത് തദ്ദേശ സ്ഥാപനങ്ങളുടെ ചുമതലയുള്ള വരണാധികാരികള്ക്ക് തിങ്കളാഴ്ച വിതരണം ചെയ്തു.
ജില്ലയിലെ ആര്ഡിഒ അടക്കമുള്ള ഉന്നത ഉദ്യോഗസ്ഥര് തിരഞ്ഞെടുപ്പ് ഉദ്യോഗസ്ഥര് ബാലറ്റ് വിതരണത്തിന് നേതൃത്വം വഹിച്ചു.
കോട്ടയം ജില്ലയിലെ 71 ഗ്രാമപഞ്ചായത്തുകളിലേക്കും 11 ബ്ലോക്ക് പഞ്ചായത്തുകളിലേക്കും 6 മുന്സിപ്പാലിറ്റികളിലേക്കും ജില്ലാ പഞ്ചായത്തിലേക്കുമുള്ള ഇവിഎം ബാലറ്റ്, ടെന്ണ്ടേഴ്സ് ബാലറ്റ്, പോസ്റ്റല് ബാലറ്റ് എന്നിവയുടെ അച്ചടിയാണ് യുദ്ധകാലാടിസ്ഥാനത്തില് പൂര്ത്തിയാക്കിയത്. രണ്ട് ബൂത്തുകള് വീതമുള്ള 1512 വാര്ഡുകളിലേക്ക് ആവശ്യമായ ബാലറ്റുകളുടെ അച്ചടി ഡപ്യൂട്ടി സൂപ്രണ്ട് സി. സതീശന്, ജനറല് ഫോര്മാന് എം.എ. മാധവന്, ഓഫ്സെറ്റ് സൂപ്പര്വൈസര് കൃഷ്ണകുമാര് എന്നിവരടങ്ങുന്ന അറുപത്തിനാല് ജീവനക്കാര് ചേര്ന്ന് പത്ത് ദിവസം കൊണ്ടാണ് പൂര്ത്തിയാക്കിയത്. ബാലറ്റുകള് ഇന്നു മുതല് കനത്ത പോലീസ് കാവലില് അതാത് തദ്ദേശ സ്ഥാപനങ്ങളില് സൂക്ഷിക്കും.
തിരഞ്ഞെടുപ്പ് കമ്മീഷന് നല്കുന്ന വോട്ടിംഗ് യന്ത്രത്തില് ബാലറ്റുകള് ഘടിപ്പിക്കുന്ന ജോലി തുടര്ന്നുള്ള ദിവസങ്ങളില് നടക്കും.
