കോഴിക്കോട്: കോഴിക്കോട് കോര്പ്പറേഷന് തെരഞ്ഞെടുപ്പ് ഉദ്യോഗസ്ഥരുടെ പരിശീലന പരിപാടി അലങ്കോലം. ഇന്നലെ ടൗണ്ഹാളില് നടനന പരിശീലന പരിപാടിയാണ് അറിയിപ്പിലെ അവ്യക്തത മൂലം ബഹളമയമായത്. ഒന്ന് മുതല് 25 വാര്ഡുകളിലെ 130 ബൂത്തുകളിലെ തെരഞ്ഞെടുപ്പ് ഉദ്യോഗസ്ഥര്ക്കാണ് ടൗണ്ഹാളില് ഇന്നലെ പരിശീലനം നല്കാന് തീരുമാനിച്ചിരുന്നത്. ഒന്ന് മുതല് 65 വരെ ബൂത്തുകളിലെ ഉദ്യോഗസ്ഥര് രാവിലെ 10നും 66 മുതല് 130 വരെയുള്ളവര്ക്ക് ഉച്ചക്ക് രണ്ടിനും എന്ന നിലയിലായിരുന്നു സമയ ക്രമീകരണം. ഇതനുസരിച്ചുള്ള സൗകര്യങ്ങള് മാത്രമാണ് ഇവിടെ ഒരുക്കിയിരുന്നത്. എന്നാല് തെരഞ്ഞെടുപ്പ് ഉദ്യോഗസ്ഥരെ വിശ്വസിക്കാനുള്ള ഇ ഡ്രോപ്പ് സംവിധാനത്തിലൂടെ കോര്പ്പറേഷന് കീഴിലെ മുഴുവന് തെരഞ്ഞെടുപ്പ് ഉദ്യോഗസ്ഥരോടും ഇന്നലെ ടൗണ്ഹാളില് എത്താന് അറിയിപ്പ് നല്കിയതാണ് പ്രശ്നത്തിന് കാരണം. സോഫ്റ്റ്വെയറിലെ തകരാര് കാരണമാണ് ഈ തെറ്റായ നിര്ദ്ദേശമുണ്ടായതെന്നാണ് അധികൃതരുടെ വിശദീകരണം.
രാവിലെ 10 മണിയോടെ എത്തിയ ഏതാണ്ട് 400 ലധികം ഉദ്യോഗസ്ഥര്ക്ക് ടൗണ്ഹാളില് ഇരിക്കാന് പോലും ഇടമില്ലായിരുന്നു. നേരത്തെ നിശ്ചയിച്ച പ്രകാരം ഒന്ന് മുതല് 65 വരെ ബൂത്തുകളിലെ ഉദ്യോഗസ്ഥര്ക്ക് മാത്രമാണ് പരിശീലനം എന്ന് റിട്ടേണിംഗ് ഓഫീസര് അറിയിച്ചതോടെ ജീവനക്കാര് ബഹളം വെച്ചു. ഏറെ നേരത്തെ തര്ക്കത്തിനു ശേഷം ബാക്കിയുള്ള ജീവനക്കാരോട് അടുത്ത ട്രെയിനിംഗ് സ്കൂളിലേക്ക് മാറിയിരിക്കാന് നിര്ദ്ദേശമുണ്ടായി. ടൗണ്ഹാളില് പരിശീലനം തുടങ്ങുകയും ചെയ്തു.
എന്നാല് ട്രെയിനിംഗ് സ്കൂളിലേക്ക് മാറിയ ജീവനക്കാര് അവിടെ യാതൊരു സൗകര്യവും ഏര്പ്പാട് ചെയ്തില്ലെന്ന പരാതിയുമായി ടൗണ്ഹാളില് ബഹളം വെച്ചതോടെ പരിശീലന ക്ലാസ് നിര്ത്തിവെക്കേണ്ടി വന്നു. രാവിലെ വിളിച്ചന്വേഷിച്ചവരോടും പരിശീലനത്തിനെത്തണമെന്നും അല്ലെങ്കില് നടപടിയുണ്ടാവുമെന്നും പറഞ്ഞ അധികൃതര് പരിശീലന സ്ഥലത്തെത്തിയ ഉദ്യോഗസ്ഥരെ വട്ടം കറക്കിയെന്ന് ഉദ്യോഗസ്ഥര് പരാതിപ്പെട്ടു. ക്ലാസ് ഏറെ നേരം തടസ്സപ്പെട്ടു. സ്ഥലത്തെത്തിയ ഉദ്യോഗസ്ഥരുടെയെല്ലാം ഹാജര് രേഖപ്പെടുത്തുമെന്ന് പറഞ്ഞതോടെയാണ് ബഹളം ശാന്തമായത്.
ഓണ്ലൈന് സന്ദേശം നല്കിയതിലെ പിശകാണ് പ്രശ്നങ്ങള്ക്ക് കാരണമെന്ന് റിട്ടേണിംഗ് ഓഫീസര് കൂടിയായ റീജ്യണല് ഫിഷറീസ് ഡെപ്യൂട്ടി ഡയറക്ടര് ടി.എം. മറിയ ഹസീന പറഞ്ഞു. ഓരോ ബൂത്തില് നിന്നും പ്രിസൈഡിംഗ് ഓഫീസറും ഫസ്റ്റ് പോളിംഗ് ഓഫീസറുമാണ് പരിശീലനത്തിന് എത്തേണ്ടിയിരുന്നത്. പരിശീലനത്തിനെത്തിയ ഉദ്യോഗസ്ഥര്ക്ക് പ്രതിഫലം നല്കുന്നതും തര്ക്കങ്ങള്ക്കിടയാക്കി. മുതിര്ന്ന ഉദ്യോഗസ്ഥര് ഇടപെട്ടാണ് പ്രശ്നം പരിഹരിച്ചത്. ഉദ്യോഗസ്ഥര്ക്ക് ലഘുഭക്ഷണം നല്കാനുള്ള സംവിധാനം പോലും ഉണ്ടായിരുന്നില്ല. ഇനി 25,26 തിയ്യതികളിലായി പരിശീലനം തുടരും.
