കോഴിക്കോട്: ചക്കോരത്തുകുളത്തുളള കുട്ടികളുടെ പാര്ക്കിന്റെ ചുറ്റുമതില് പൊളിച്ചുനീക്കണമെന്ന് സംസ്ഥാന ബാലാവകാശസംരക്ഷണ കമ്മീഷന് നിര്ദ്ദേശിച്ചു. പാര്ക്കിനുചുറ്റും ഉയരത്തില് മതില് നിര്മ്മിച്ചിരിക്കുന്നത് പാര്ക്കിനുളളില് സമയം ചെലവിടാനെത്തുന്ന കുട്ടികളുടെ സുരക്ഷയെ ബാധിക്കുമെന്ന് കമ്മീഷന് ഫുള് ബെഞ്ച് ഉത്തരവില് ചൂണ്ടിക്കാട്ടി. പാര്ക്കിന്റെ പരിസരത്തെ മാലിന്യനിക്ഷേപം തടയേണ്ടതും പരിസരം ശുചിയായി സൂക്ഷിക്കേണ്ടതും കോഴിക്കോട് കോര്പ്പറേഷന് സെക്രട്ടറിയുടെ ഉത്തരവാദിത്തമായിരിക്കും.
ചില്ഡ്രന്സ് പാര്ക്കും ലൈബ്രറിയും ആരംഭിക്കാനായി കോഴിക്കോട് കോര്പ്പറേഷന് റോട്ടറി ക്ലബ്ബ് ഓഫ് കാലിക്കറ്റ് ഈസ്റ്റിന് നല്കിയ സ്ഥലം മറ്റാവശ്യങ്ങള്ക്കായി ഉപയോഗിക്കുന്നുവെന്ന മാധ്യമവാര്ത്തകളെത്തുടര്ന്ന് ഡോ. എ. അച്യുതന് നല്കിയ പരാതിയിലാണ് ചെയര് പേഴ്സണ് ശോഭാ കോശി, അംഗങ്ങളായ കെ. നസീര്, സി.യു മീന എന്നിവരടങ്ങിയ സംസ്ഥാന ബാലാവകാശ സംരക്ഷണ കമ്മീഷന് ഫുള് ബെഞ്ചിന്റെ ഉത്തരവ്. പാര്ക്കിനുള്ളില് റോട്ടറിക്ലബ്ബിന്റെ നേതൃത്വത്തില് അനധികൃത മദ്യശാല നടത്തുന്നതിനെതിരെ വിവേകാനന്ദ വിചാരവേദി സെക്രട്ടറി കെ. ഷൈബു ഉപവാസം നടത്തിയിരുന്നു. സ്ഥലം സര്ക്കാര് ഏറ്റെടുക്കണമെന്നും കുട്ടികളുടെ പാര്ക്കായി നിലനിര്ത്തണമെന്നും ആവശ്യപ്പെട്ട് വേദി സമരങ്ങള് നടത്തിയിരുന്നു.
ചുറ്റുമതില് കെട്ടിയിരിക്കുന്നതിനാല് കുട്ടികളേയും പൊതുജനങ്ങളേയും ആകര്ഷിക്കുന്ന രീതിയിലല്ല പാര്ക്കിന്റെ സ്വഭാവമെന്ന് സ്ഥലം സന്ദര്ശിച്ച കമ്മീഷന് കണ്ടെത്തി. ധൈര്യമായി കുട്ടികളെ പാര്ക്കിലേയ്ക്കയയ്ക്കാന് രക്ഷിതാക്കള് മടിക്കുന്നു. അതിനാല് ചുറ്റുമതില് നീക്കി സാധാരണ പാര്ക്കുകള് പോലെ കുട്ടികളെ ആകര്ഷിക്കുന്ന രീതിയില് സജ്ജീകരിക്കണം. കുട്ടികള്ക്ക് പൂര്ണ്ണമായും ഉപയോഗിക്കത്തക്കതരത്തില് പുതിയ സൗകര്യത്തോടെയും സജ്ജീകരണങ്ങളോടെയും പാര്ക്ക് പ്രവര്ത്തിക്കുന്നുവെന്ന് കോഴിക്കോട് കോര്പ്പറേഷന് സെക്രട്ടറി ഉറപ്പുവരുത്തണമെന്നും കമ്മീഷന് നിര്ദ്ദേശിച്ചിട്ടുണ്ട്.
സംസ്ഥാനത്ത് സര്ക്കാരിന്റെയോ തദ്ദേശസ്വയം ഭരണ സ്ഥാപനത്തിന്റെയോ സ്ഥലം കുട്ടികളുടെ ആവശ്യങ്ങള്ക്ക് നീക്കിവെച്ചിട്ടുണ്ടെങ്കില് അത് ആ ആവശ്യത്തിനുമാത്രമായാണ് ഉപയോഗിക്കുന്നതെന്ന് ഉറപ്പുവരുത്തണമെന്ന് തദ്ദേശസ്വയം’രണവകുപ്പ് സെക്രട്ടറിക്ക് സംസ്ഥാന ബാലാവകാശസംരക്ഷണ കമ്മീഷന് നിര്ദ്ദേശം നല്കി. മറ്റു സ്ഥാപനങ്ങള്ക്ക് കുട്ടികളുടെ ആവശ്യത്തിനായി പാട്ടത്തിനു നല്കിയിട്ടുളള കേസുകളിലും നിര്ദ്ദേശം ബാധകമാണ്. എല്ലാ തദ്ദേശസ്വയം’രണ സ്ഥാപനങ്ങള്ക്കും ഇക്കാര്യത്തില് നിര്ദ്ദേശം നല്കണമെന്നും കമ്മീഷന് തദ്ദേശസ്വയം ഭരണവകുപ്പ് സെക്രട്ടറിയോട് ആവശ്യപ്പെട്ടു.
പാര്ക്ക് സ്ഥിതിചെയ്യുന്ന 60.6 സെന്റ് സ്ഥലം കോഴിക്കോട് കോര്പ്പറേഷന് 1974-ല് കുട്ടികളുടെ ലൈബ്രറിയും ട്രാഫിക് പാര്ക്കും സ്ഥാപിക്കുന്നതിനായി റോട്ടറി ക്ലബ്ബ് ഓഫ് കാലിക്കറ്റ് ഈസ്റ്റിന് നല്കിയെന്ന് പരാതിക്കാരന് ബോധിപ്പിച്ചിരുന്നു. എന്നാല് കഴിഞ്ഞ 15 വര്ഷമായി ലൈബ്രറിയും ട്രാഫിക് പാര്ക്കും പ്രവര്ത്തിക്കുന്നില്ലെന്നും കരാറിന് വിപരീതമായി അവിടെ ഹാള് നിര്മ്മിച്ച് വാടകയ്ക്ക് നല്കിവരികയാണെന്നുമാണ് പരാതി.
