മുംബൈ: ഇന്നലെ മുംബയില് രാഷ്ട്രത്തിനു സമര്പ്പിച്ച ഐഎന്എസ് കൊച്ചി ഭാരതം ആഭ്യന്തരമായി നിര്മ്മിച്ച ഏറ്റവും വലിയ യുദ്ധക്കപ്പലാണ്. മുംബൈ മാസഗോണ് ഡോക്കിലാണ് നിര്മ്മിച്ചത്. വിദേശരാജ്യങ്ങളില് നിര്മ്മിക്കുന്ന കപ്പലുകളെ വെല്ലുന്ന തരത്തിലാണ് ഐഎന്എസ് കൊച്ചിയുടെ നിര്മ്മാണം.
മിസൈല് നശീകരണിക്കപ്പലില് സര്വ്വവിധ ആയുധങ്ങളുമുണ്ട്. വിമാനവാഹിനി കഴിഞ്ഞാല് പിന്നെ ഏറ്റവും പ്രാധാന്യമുള്ളവയാണ് മിസൈല് നശീകരണികള്. 7500 ടണ് ഭാരമുളള കപ്പല് മസഗോണ് ഡോക്കില് നിര്മ്മിച്ച മൂന്ന് കൊല്ക്കത്ത കഌസ് നശീകരണികളില് രണ്ടാമത്തേതാണ്. വില നാലായിരം കോടി രൂപ. ഭാരതത്തിന്റെ കൈയിലുള്ള പത്താമത് നശീകരണിയാണിത്.
കൊല്ക്കത്ത കഌസില് പെട്ട ആദ്യ കപ്പല്ഐഎന്എസ് കൊല്ക്കൊത്ത കഴിഞ്ഞ വര്ഷം ആഗസ്റ്റിലാണ് നീറ്റിലിറക്കിയത്. മൂന്നാമത്തേത് ഐഎന്എസ് ചെന്നൈ അടുത്ത വര്ഷം സൈന്യത്തില് ഉള്പ്പെടുത്തും.ഇവയ്ക്കു പുറമേ നാല് പടുകൂറ്റന് നശീകരണികള് മസഗോണ് ഡോക്കില് നിര്മ്മിച്ചുവരികയാണ്. അവയ്ക്ക് ഒന്നിന് 29,644 കോടി രൂപ വിലവരും. ഇവയിലെ ആദ്യത്തേത് 2018ല് നീറ്റിലിറക്കും.
2027 ഓടെ 200 യുദ്ധക്കപ്പലുകളും 600 വിമാനങ്ങളും ഹെലിക്കോപ്ടറുകളും സ്വന്തമാക്കാനാണ് നാവിക സേനയുടെ പദ്ധതി. മുങ്ങിക്കപ്പലുകളുടെ കാര്യത്തില് നാവിക സേന കടുത്ത ദൗര്ലഭ്യമാണ് അനുഭവിക്കുന്നത്. 13 പരാമ്പരാഗത ഡീസല് ഇലക്ട്രിക് അന്തര്വാഹികള് മാത്രമാണ് നമക്കുള്ളത്. പുറമേ ആണവശക്തികൊണ്ടു പ്രവര്ത്തിക്കുന്ന ഒന്നും. ചൈനയ്ക്ക് അഞ്ച് ആണവ മുങ്ങിക്കപ്പലുകളും 51 പരമ്പരാഗത മുങ്ങിക്കപ്പലുകളും ഉണ്ട്. ദീര്ഘദൂര പരിധിയുള്ള ബാലിസ്റ്റിക് മിസൈലുകള് ഘടിപ്പിച്ച അഞ്ചെണ്ണം കൂടി സൈന്യത്തില് ചേര്ക്കാന് ഒരുങ്ങുകയാണ് ചൈന.
