സൗദി: മിനായിലെ അപകടത്തില്‍ ഒരു മലയാളി കൂടി മരിച്ചു. പൊന്നാനി ഉറൂബ് നഗര്‍ സ്വദേശി പുതുവീട്ടില്‍ കുഞ്ഞുമോനാണ് മരിച്ചതെന്ന് സ്ഥിരീകരിച്ചു. ഇതോടെ അപകടത്തില്‍ 9 മലയാളികള്‍ ഉള്‍പ്പടെ 29 ഇന്ത്യക്കാര്‍ മരിച്ചു. മിനാ ദുരന്തത്തില്‍ മരിച്ചവരുടെ എണ്ണം 769 ആയി. 934 പേര്‍ക്ക് പരുക്കേറ്റിട്ടുണ്ട്.
സൗദി ആരോഗ്യമന്ത്രി എന്‍ജിനീയര്‍ ഖാലിദ് അല്‍ സ്വലിഹാണ് ഇക്കാര്യം അറിയിച്ചത്. ഇതില്‍ 100 ലധികം പേരുടെ നില അതീവ ഗുരുതരമായി തുടരുന്നു. കാണാതായ നിരവധി മലയാളി തീര്‍ത്ഥാടകര്‍ക്ക് വേണ്ടിയുള്ള അന്വേഷണം ഇപ്പോഴും തുടരുകയാണ്. കൂടുതല്‍ ഇന്ത്യക്കാര്‍ അപകടത്തില്‍ ഉള്‍പ്പെട്ടിട്ടുണ്ട് എന്നാണ് ഹജ്ജ് മിഷന്റെ വിലയിരുത്തല്‍.
ഹജ്ജ് മിഷന്‍ പ്രവര്‍ത്തകരും വളണ്ടിയര്‍മാരും ഇവരെ കുറിച്ച് അന്യേഷണം നടത്തി വരികയാണ്. അതെ സമയം അപകട കാരണങ്ങളെ കുറിച്ച് വിത്യസ്ത അഭിപ്രായങ്ങളാണ് സോഷ്യല്‍ മീഡിയ വഴി പ്രചരിക്കുന്നത്. സൗദി സര്‍ക്കാറിനെ രൂക്ഷമായി വിമര്‍ശിച്ചു കൊണ്ടു ഇറാന്‍ അടക്കമുള്ള രാജ്യങ്ങള്‍ പരസ്യമായി രംഗത്ത് വന്നു.
എന്നാല്‍ തീര്‍ത്ഥാടകര്‍ നിര്‍ദേശങ്ങള്‍ ലംഘിച്ചതാണ് ദുരന്തത്തിന് കാരണമെന്നാണ് സൗദിയുടെ വിശദീകരണം. സോഷ്യല്‍ മീഡിയ വഴി രാജ്യത്തിനെതിരെ നടത്തുന്ന കുപ്രചാരങ്ങള്‍ സൗദി സര്‍ക്കാര്‍ സൂക്ഷമമായി നിരീക്ഷിക്കുന്നുണ്ട്. കുറ്റക്കാര്‍ക്കെതിരെ ശക്തമായ നടപടികള്‍ കൈക്കൊള്ളുമെന്ന് ബന്ധപ്പെട്ടവര്‍ അറിയിച്ചു. സംഭവത്തെ കുറിച്ച് വിശദമായ അന്യേഷണത്തിന് സൗദി രാജാവ് ഉത്തരവിറക്കിയിട്ടുണ്ട്.
