കാഞ്ഞിരപ്പള്ളി: വാട്ടര് അതോറിറ്റിയുടെ പൈപ്പ് സ്ഥാപിക്കുന്നതിലെ അപാകത മൂലം ബസ്സ്റ്റാന്ഡ് കവാടത്തിലെ ദേശീയപാതയില് ടൈല് പതിക്കുന്നത് വൈകുന്നു.
കഴിഞ്ഞ ദിവസം മാറ്റി സ്ഥാപിച്ച പൈപ്പ് ലൈനുകളില് വീണ്ടും ചോര്ച്ചയുണ്ടായതാണ് കാരണം. ദേശീയ പാതയ്ക്കടിയിലൂടെ കടന്നു പോകുന്ന പ്രധാന പൈപ്പില് നിന്നും വ്യക്തിഗത ഗുണഭോക്താക്കള്ക്ക് വിതരണം ചെയ്യാനുള്ള പൈപ്പുകള് കൂട്ടിചേര്ത്തിരിക്കുന്ന ഭാഗത്താണ് ചോര്ച്ച കണ്ടെത്തിയത്. ഗുണനിലവാരമുള്ളതും, അനുയോജ്യവുമായ പൈപ്പുകള് സ്ഥാപിക്കാത്തതാണ് ചോര്ച്ചയ്ക്ക് കാരണമെന്ന് നാട്ടുകാര് ആരോപിക്കുന്നു. ഇന്നലെ വൈകിട്ട് എംഎല്എ സ്ഥലത്തെത്തി പൈപ്പ് ലൈനുകളുടെ തകരാര് എത്രയും വേഗം പരിഹരിക്കാന് വാട്ടര്അതോറിറ്റി ഉദ്യോഗസ്ഥര്ക്ക് നിര്ദ്ദേശം നല്കി.
ബസ് സ്റ്റാന്റിന് മുന്നില് ദേശീയ പാതയില് വെള്ളമൊഴുകി പതിവായി ടാറിങ്ങ് തകരുന്നതിനാലാണ് ഇവിടെ 55 മീറ്റര് ദൂരത്തില് ടൈല്പതിക്കാന് ദേശീയ പാതവിഭാഗം തീരുമാനിച്ചത്. ഈ മാസം 12ന് ടൈല് പതിക്കുന്നതിനുള്ള പ്രവര്ത്തനങ്ങള് ആരംഭിച്ചു. എന്നാല് പാത ടൈല് പാകി നവീകരിച്ച ശേഷം വാട്ടര് അതോറിറ്റിയുടെ പൈപ്പ് ലൈനുകളുടെയും, ടെലിഫോണ് കേബിളുകളുടെയും, ഓടകളുടെയും അറ്റകുറ്റപ്പണികളുടെയും പേരില് വീണ്ടും റോഡ് കുത്തിപൊളിക്കാതിരിക്കാന്, ഇവ പാത നവീകരണത്തിന് മുന്പ് നടത്തണമെന്ന് ആവശ്യം ഉയര്ന്നു. ഇതിനിടെ ഒരു വശത്തെ ഓട നവീകരണം പൂര്ത്തിയാക്കി ബുധനാഴ്ച്ച ടൈല് പതിക്കുന്ന ജോലികള് ആരംഭിച്ചെങ്കിലും വീണ്ടും മുടങ്ങിയ സ്ഥിതിയാണ്. ദേശീയ പാതയില് ജോലികള് നടക്കുന്നതിനാല് ഒരു ഭാഗത്തുകൂടി മാത്രമാണ് വാഹന ഗതാഗതം അനുവദിച്ചിരിക്കുന്നത്.
