കരുനാഗപ്പള്ളി: മുന് രാഷ്ട്രപതി ഡോ. എ.പി.ജെ. അബ്ദുള്കലാമിന്റെ പതിനൊന്നാം ചരമവാര്ഷികാചരണത്തിന്റെ ഭാഗമായി ഡോ. എ.പി.ജെ. അബ്ദുള്കലാം ഇന്റര്നാഷണല് ഫൗണ്ടേഷന് ഏര്പ്പെടുത്തിയ ജനനി അവാര്ഡ് 2026 മാതാ അമൃതാനന്ദമയി ദേവിക്ക് സമ്മാനിച്ചു. അമൃതപുരി ആശ്രമത്തില് ഗവര്ണര് രാജേന്ദ്ര വിശ്വനാഥ് ആര്ലേക്കര് പുരസ്കാരം അമ്മയ്ക്ക് സമര്പ്പിച്ചു. മാനവിക-സാമൂഹ്യ സേവനങ്ങള്, സമൂഹപരിവര്ത്തനം, സ്ത്രീശാക്തീകരണം എന്നീ മേഖലകളില് മാതാ അമൃതാനന്ദമയിദേവി നല്കിയ സമഗ്രസംഭാവനകള് പരിഗണിച്ചാണ് പുരസ്കാരം സമ്മാനിച്ചത്.
‘മറ്റുള്ളവര്ക്കായി സേവനം ചെയ്യുമ്പോഴാണ് മനുഷ്യജന്മം പൂര്ണമാകുന്നത്’ എന്ന അമ്മയുടെ സന്ദേശം മുന് രാഷ്ട്രപതി ഡോ. എ.പി.ജെ. അബ്ദുള് കലാമിന്റെ ജീവിതദര്ശനത്തോടും മൂല്യങ്ങളോടും ചേര്ന്നുനില്ക്കുന്നതാണെന്ന് ഗവര്ണര് പറഞ്ഞു. പുരസ്കാരം ഏറ്റുവാങ്ങിയ ശേഷം സംസാരിച്ച മാതാ അമൃതാനന്ദമയി ദേവി, രാജ്യത്തെ ശാസ്ത്രരംഗത്ത് ഉന്നതിയിലെത്തിക്കുകയെന്ന ഏകലക്ഷ്യത്തോടെ പ്രവര്ത്തിച്ച മഹത്തായ വ്യക്തിത്വമായിരുന്നു ഡോ. എ.പി.ജെ. അബ്ദുള്കലാമെന്ന് പറഞ്ഞു. ഡോ. എപിജെ. അബ്ദുള് കലാമിന്റെ ദര്ശനവും മൂല്യങ്ങളും ആസ്പദമാക്കി എഐ സാങ്കേതികവിദ്യയുടെ സഹായത്തോടെ ഒരുക്കുന്ന ‘കലാംസ് എയ്ഞ്ചല്’ എന്ന പ്രചോദനാത്മക ചിത്രത്തിന്റെ ഔദ്യോഗികപോസ്റ്റര് പ്രകാശനവും രാജ്യവ്യാപക വനിതാ ശാക്തീകരണ പ്രസ്ഥാനമായ ‘ജനനി 2026’ന്റെ ഔദ്യോഗിക ഉദ്ഘാടനവും ഗവര്ണര് നിര്വഹിച്ചു.
എ.പി.ജെ. അബ്ദുള് കലാം ഇന്റര്നാഷണല് ഫൗണ്ടേഷന് ചെയര്പേഴ്സണ് ഡോ. എ.പി.ജെ.എം. നസീമ മരക്കാര്, എക്സിക്യൂട്ടീവ് ചെയര്മാന് ഡോ. ജെറി മാത്യു, ഓര്ഗനൈസിങ് സെക്രട്ടറി ഓളീവിയ സൈറ റൈജു എന്നിവര് സംസാരിച്ചു.
