കോഴിക്കോട്: മെമ്പര്ഷിപ്പെടുക്കാത്തതിന്റെ പേരില് കക്കോടിയില് കുടുംബത്തിനു നേരെ ഡി വൈ എഫ് ഐ അക്രമം. എന് ജി ഒ അസോസിയേഷന് മുന് സംസ്ഥാന സെക്രട്ടേറിയേറ്റംഗം പി എം കൃഷ്ണന്റെ വീടിന് നേരെയാണ് കഴിഞ്ഞ ദിവസം രാത്രി ആറംഗ സംഘം ആക്രമണം നടത്തിയത്.
സംഭവത്തില് കേസെടുത്ത ചേവായൂര് പൊലീസ് ഡി വൈ എഫ് ഐ പ്രവര്ത്തകനായ ജിതിന് എന്ന പ്രവര്ത്തകനെ കസ്റ്റഡിയിലെടുത്തു
ചൊവ്വാഴ്ച രാത്രി പത്തരയോടെയാണ് കക്കോടി കിഴക്കുംമുറിയിലുള്ള പി എം കൃഷ്ണന്റെ വീടിന് നേരെ ആക്രമണം നടത്തിയത്.
മുഖം മൂടി ധരിച്ച നാലു പേരും മറ്റ് രണ്ടു പേരുമാണ് സംഘത്തിലുണ്ടായിരുന്നതത്രെ. ജിതിന് മുഖംമൂടി ധരിച്ചിരുന്നില്ലെന്ന് വീട്ടുകാര് പൊലീസില് മൊഴി നല്കി.
വീടിന്റെ ജനല്ച്ചില്ലുകള് കല്ലെറിഞ്ഞ് തകര്ത്ത നിലയിലാണ്.
മുറ്റത്ത് നിര്ത്തിയിട്ടിരുന്ന കാറും തകര്ത്തു. ഇരുപത് മിനിറ്റോളം ഭീകരന്തരീക്ഷം സൃഷ്ടിച്ചാണ് അക്രമികള് മടങ്ങിയത്.
ഞായറാഴ്ച മെമ്പര്ഷിപ്പിനായി ഡി വൈ എഫ് ഐ പ്രവര്ത്തകര് ഇവിടെയെത്തിയിരുന്നു. എന്നാല് കൃഷ്ണന്റെ മക്കള് മെമ്പര്ഷിപ്പെടുക്കാന് വിസമ്മതിച്ചതോടെയാണ് ഇവര് പ്രകോപിതരായത്.
