നടുവനാട്: നടുവനാട് തലച്ചങ്ങാടില് വീണ്ടും സിപിഎം അക്രമം. തിങ്കളാഴ്ച് രാത്രി നടുവനാട്ടെ ബാര്ബര് തൊഴിലാളി തലച്ചങ്ങാട് പി.ഗോവിന്ദന്റെ മകന് സജയകുമാറിനെ(28) യാണ് ഒരു സംഘം സിപിഎം പ്രവര്ത്തകര് തല്ലിച്ചതച്ചത്. ഇയാള് തലശ്ശേരി ഇന്ദിരാഗാന്ധി സഹകരണാശുപത്രിയില് ചികിത്സയിലാണ്. സിപിഎം ക്രിമിനലുകളുടെ കേന്ദ്രമായ തലച്ചങ്ങാട്ടെ ക്വട്ടേഷന് സംഘമാണ് അക്രമം നടത്തിയത്. പോലീസില് പരാതിപ്പെട്ടാല് പിന്നീട് നിന്നെയും നിന്റെ കുടുംബത്തെയും ജീവിക്കാന് അനുവദിക്കില്ല എന്ന അവരുടെ ഭീഷണി കാരണം ഇതുവരെയും പരാതി നല്കാന് പോലും സാധിക്കാത്ത അവസ്ഥയിലാണ് ഈ യുവാവ്.
സിപിഎം ഈ മേഖലയില് നടത്തുന്ന അക്രമങ്ങളുടെയും മറ്റ് സാമൂഹിക തിന്മകള്ക്കെതിരെയും ശബ്ദിക്കുന്നവരെ അടിച്ചൊതുക്കുകയും പോലീസില് പരാതിപ്പെടാന് ശ്രമിച്ചാല് ഭീഷണിപ്പെടുത്തി പിന്തിരിപ്പിക്കുകയുമാണ് പതിവ്. രാത്രിയാകുന്നതോടെ തലച്ചങ്ങാട് കോളനി പരിസരത്ത് സംഘടിച്ചെത്തുന്ന മദ്യപന്മാരുടെയും സാമൂഹ്യവിരുദ്ധരുടെയും സംഘമാണ് സിപിഎമ്മിന്റെ നേതൃത്വത്തില് അക്രമം അഴിച്ചുവിടുന്നത്. മാന്യമായി വഴിനടക്കാന്പോലും സമ്മതിക്കാത്ത തരത്തിലുള്ള സിപിഎം പ്രവര്ത്തകരുടെ ചെയ്തികള്ക്കെതിരെ പ്രദേശവാസികളുടെ വ്യാപകമായ പ്രതിഷേധം ഉയര്ന്നിട്ടുണ്ട്.
