ഏറ്റുമാനൂര് : ഏറ്റുമാനൂര് മഹാദേവ ക്ഷേത്രോപദേശക സമിതി പുന:സംഘടിപ്പിക്കണമെന്ന് ആവശ്യപ്പെട്ട് നാമജപയജ്ഞവും ഉപവാസവും നടത്തും.
നിലവിലുള്ള ഉപദേശക സമിതി പുന:സംഘടിപ്പിക്കണമെന്ന് ആവശ്യപ്പെട്ടാണ് വിവിധ ഹൈന്ദവ സംഘടനകളുടെ ആഭിമുഖ്യത്തില് 24ന് രാവിലെ 8 മണി മുതല് പടിഞ്ഞാറേ നടയില് നാമജപയജ്ഞവും ഉപവാസവും നടത്തുന്നത്. ക്ഷേത്രത്തിലെ സ്വര്ണ്ണ കൊടിമരം പുന:പ്രതിഷ്ഠിക്കുന്നതിനു വേണ്ടി വര്ഷങ്ങള് മുമ്പ് കേരള ഹൈക്കോടതി നിര്ദ്ദേശപ്രകാരം ഹൈന്ദവസംഘടനാ പ്രതിനിധികളെ ഉള്പ്പെടുത്തി ദേവസ്വം ബോര്ഡ് അഡ്വക്കെറ്റ് കമ്മീഷണറുടെ നേതൃത്വത്തില് ഒരു കമ്മിറ്റി രൂപീകരിച്ചിരുന്നു. കൊടിമരം പ്രതിഷ്ഠച്ച ശേഷം പ്രസ്തുത കമ്മിറ്റി പിരിച്ചു വിടാതെ, അതിലെ ചിലരെ ഒഴിവാക്കി ക്ഷേത്രത്തില് വികസന പദ്ധതികള് നടപ്പാക്കാന് എന്ന പേരില് ഒരു മാസ്റ്റര് പ്ലാന് തയാറാക്കി മാസ്റ്റര് പ്ലാന് ഇംപ്ലിമെന്റെഷന് കമ്മിറ്റി രൂപീകരിച്ചു. ഏകദേശം 13.5 കോടി രൂപാ ചിലവു വരുന്ന വന്പദ്ധതിയില് ഷോപ്പിംഗ് കോംപ്ലെക്സ്, ശൗചാലയങ്ങള്, കോണ്ഫറന്സ് ഹാള്, കുളപ്പുര മാളിക, നടപ്പന്തലുകള് എന്നിവ ഉള്പ്പെടുത്തിയിരുന്നു. എന്നാല് കൊട്ടിഘോഷിച്ച് ഉദ്ഘാടനം നടത്തിയ മാസ്റ്റര് പ്ലാന് എങ്ങും എത്താതെ തെക്കുവശത്ത് ഒരു നടപ്പന്തല് പണിയില് മാത്രം ഒതുങ്ങി. പന്തലിനായി മറ്റു നടകളില് പണിതുയര്ത്തിയ കോണ്ക്രീറ്റ് തൂണുകള് നോക്കുകുത്തികളായി മുറ്റത്തും കുളക്കടവിലും നില്ക്കുന്നു. പിന്നീട് ആ മാസ്റ്റര് പ്ലാന് ഇംപ്ലിമെന്റെഷന് കമ്മിറ്റി പേര് മാറ്റി ക്ഷേത്രോപദേശക സമിതി എന്നാക്കിയിരിക്കുകയാണ്.
കൃഷ്ണന്കോവിലിലെ പ്രദക്ഷണവഴി ഒരു ക്ഷേത്രത്തിന്റെ പ്രൗഢിക്കും പവിത്രതക്കും ചേരാത്ത രീതിയില് ഗ്ലേസ്സ്ഡ് ടൈല്സ് പാകി ഭക്തജനങ്ങള് നിത്യവും തെന്നി വീഴുന്ന അവസ്ഥയില് ആയിരുന്നു. പരാതിയെത്തുടര്ന്ന് വീണ്ടും അതെല്ലാം പൊളിച്ചു മാറ്റാന് തുടങ്ങി.നിലവിലെ ഉപദേശകസമിതി ഭക്തജന പങ്കാളിത്തത്തോടെ പുന:സംഘടിപ്പിക്കണം എന്ന് ആവശ്യപ്പെട്ടാണ് വിവിധ ഹൈന്ദവ സംഘടനകള് ഉപവാസം നടത്തുന്നത്.
