ന്യൂയോര്‍ക്ക്: ഏതാനും വര്‍ഷം മുന്‍പു വരെ നമ്മുടെ സൗരയൂഥത്തിലെ ഒരംഗവും ഒന്‍പതാമത്തെ ഗ്രഹവുമായിരുന്ന പഌട്ടോയുടെ പുതിയ ചിത്രങ്ങള്‍ നാസ പുറത്തുവിട്ടു. (പ്ലൂട്ടോയെ ഇപ്പോള്‍ ഒന്‍പതാമത്തെ ഗ്രഹമായി അംഗീകരിക്കുന്നില്ല, മാത്രമല്ല അത് കുള്ളന്‍ ഗ്രഹമാണെന്ന് തെളിയുകയും ചെയ്തിരുന്നു)
അതിഗംഭീരമായ മഞ്ഞുമലകളും വിശാലമായ സമതലങ്ങളും മറ്റും നിറഞ്ഞ കുള്ളന്‍ ഗ്രമാണ് പഌട്ടോയെന്നാണ് പുതിയ ചിത്രങ്ങള്‍ തെളിയിക്കുന്നത്.നാസയുടെ ന്യൂഹൊറൈസണ്‍( പുതിയ ചക്രവാളങ്ങള്‍) എന്ന ശൂന്യകാശ വാഹനമാണ് പഌട്ടോയുടെ പുതിയ ഉഗ്രന്‍ ഫോട്ടോകള്‍ എടുത്തിരിക്കുന്നത്. മാത്രമല്ല പഌട്ടോ ഭൂമിയേപ്പോലെ തന്നെയാണെന്നും ഇവ തെളിയിക്കുന്നതായി നാസ പറഞ്ഞു.
ജൂലൈ പതിനാലിന് സൂര്യാസ്തമയസമയത്താണ് ന്യൂ ഹൊറൈസണ്‍ പഌട്ടോയുടെ ഫോട്ടോയെടുത്തത്. 11,000 അടി ഉയരമുള്ള മലകളും സമതലങ്ങളും മഞ്ഞുമലകളും എല്ലാം ഈ ചിത്രത്തിലുണ്ട്. ഈ മലകള്‍ക്ക് നാസ പേരുമിട്ടു, നോര്‍ഗെ മൗണ്ടന്‍, ഹിലാരി മൗണ്ടന്‍. എവറസ്റ്റ് കൊടുമുടി ആദ്യമായി കീഴടക്കിയ ടെന്‍സിംഗ് നോര്‍ഗെ, എഡ്മണ്ട് ഹിലാരി എന്നിവരുടെ പേര്.
ഈ ചിത്രങ്ങള്‍ കണ്ടാല്‍ നിങ്ങള്‍ അവിടെയാണെന്ന് തോന്നും… ഹൊറൈസണ്‍ തലവന്‍ ഡോ. അലന്‍ സ്‌റ്റേണ്‍ പറഞ്ഞു.പഌട്ടോയുടെ അന്തരീക്ഷം, മലനിരകള്‍, മഞ്ഞുമലകള്‍, സമതലങ്ങള്‍ എന്നിവയൊക്കെ വെളിവാക്കുന്ന പുതിയ ഫോട്ടോകള്‍ ശാസ്ത്രീയ നിധിയാണ്. അദ്ദേഹം പറഞ്ഞു.
11,000 മൈല്‍ അകലെ നിന്നാണ് ഫോട്ടോയെടുത്തത്.അന്തരീക്ഷം പല പല നൈട്രജന്‍പാളകള്‍ നിറഞ്ഞതാണെന്നും ഫോട്ടോയില്‍ കാണാം.ഭൂമിയിലേതു പോലെ ദിവസവും കാലാവസ്ഥ ഇവിടെയും മാറുന്നുണ്ട്.ധ്രുവങ്ങളില്‍ കാണുന്നതുപോലെയുള്ള മഞ്ഞുമലകളാണ് ഇവിടെയും.
