ആലപ്പുഴ: ശാസ്ത്രീയ സോഷ്യലിസത്തിന്റെ രാഷ്ട്രീയം നഷ്ടപ്പെട്ട കമ്യൂണിസം എടുക്കാത്ത നാണയമായി മാറിയെന്നും ജനങ്ങളെ പിടിച്ചു നിര്ത്താന് വെപ്രാളപ്പെടുകയാണെന്നും ബിജെപി സംസ്ഥാന സെല് കോ-ഓര്ഡിനേറ്റര് അഡ്വ. ബി. ഗോപാലകൃഷ്ണന് പറഞ്ഞു.
സിപിഎമ്മിന്റെ ഗുരുദേവ നിന്ദയ്ക്കെതിരെ ബിജെപി അമ്പലപ്പുഴ നിയോജകമണ്ഡലം കമ്മറ്റി സംഘടിപ്പിച്ച പ്രതിഷേധ സമ്മേളനം ഉദ്ഘാടനം ചെയ്യുകയായിരുന്നു അദ്ദേഹം. വികസനം മാത്രമാണ് ബിജെപിയുടെ രാഷ്ട്രീയം രാജ്യത്തിന് നല്ലതു വരുമ്പോള് എതിര്ക്കുകയാണ് കമ്യൂണിസ്റ്റുപാര്ട്ടിയുടെ നയമെന്നും അദ്ദേഹം പറഞ്ഞു. എല്ലാക്കാലത്തും ദേശീയ പുരുഷന്മാരെ അവഹേളിച്ച ചരിത്രമാണ് സിപിഎമ്മിനുള്ളത്. നേരത്തെ മാതാ അമൃതാനന്ദമയിയെ അവേഹളിച്ച സിപിഎം യുഗപുരുഷനായ ശ്രീനാരായണ ഗുരുദേവനെയും കുരിശില് തറച്ച് അവഹേളിച്ചിരിക്കുകയാണ്. ഗുരുനിന്ദ സിപിഎമ്മിന്റെ അധപതനത്തിലേക്കുള്ള മാര്ഗ്ഗമാണെന്നും അദ്ദേഹം പറഞ്ഞു. എസ്എന്ഡിപിയെ നിരന്തരം വേട്ടയാടുന്ന സിപിഎം ന്യൂനപക്ഷ പ്രീണനം നടത്താന് മത്സരിക്കുകയാണ്. എല്ലാക്കാലത്തും ദേശീയതയെ എതിര്ത്ത ചരിത്രമാണ് സിപിഎമ്മിനുള്ളത്. ഇഎംഎസ്സിന്റെ കാലം മുതല് ഗുരുനിന്ദയാണ് സിപിഎം നടത്തിവരുന്നത്.
ബിജെപി നിയോജകമണ്ഡലം പ്രസിഡന്റ് എല്.പി ജയചന്ദ്രന് അദ്ധ്യക്ഷത വഹിച്ചു. ജില്ലാ ജനറല് സെക്രട്ടറി കൊട്ടാരം ഉണ്ണികൃഷ്ണന്, ജില്ലാ വൈസ് പ്രസിഡന്റ് പി.കെ.വാസുദേവന്, മണ്ഡലം ഭാരവാഹികളായ ഡി. പ്രദീപ്, കെ. വിജയനാഥന്, വി. ബാബുരാജ്, വി.സി. സാബു, പി. ലിജു, എസ്. ബൈജുകുമാര്, മോര്ച്ച പ്രസിഡന്റുമാരായ ആര്. കണ്ണന്, ജി. രമേശന്, ബിജു തുണ്ടില്, കെ.എ. ഫ്രാന്സിസ്, ജില്ലാ കമ്മറ്റിയംഗം വി. ശ്രീജിത്ത് തുടങ്ങിയവര് സംസാരിച്ചു.
