പൊന്കുന്നം: തൊഴിലാളി പ്രസ്ഥാനമെന്നു പറയുന്ന സിപിഎമ്മിനെ മൂന്നാറില് തൊഴിലാളികള് ചെരുപ്പുമാല അണിയിക്കുന്ന അവസ്ഥയിലെത്തിയതായി ബിജെപി സംസ്ഥാന സമിതിയംഗം ശ്രീനഗരി രാജന്. പൊന്കുന്നത്ത് ബിജെപി ചിറക്കടവ് പഞ്ചായത്ത് കമ്മറ്റി സംഘടിപ്പിച്ച ജനജാഗ്രതാസദസ് ഉദ്ഘാടനം ചെയ്യുകയായിരുന്നു അദ്ദേഹം.
വരുന്ന പഞ്ചായത്ത് തെരഞ്ഞെടുപ്പില് ബിജെപി കേരളത്തില് വിപ്ലവകരമായ നേട്ടം കൈവരിക്കുമെന്നും ശ്രീനഗരി രാജന് പറഞ്ഞു. കമ്മ്യൂണിസ്റ്റ് പ്രസ്ഥാനം കേരളത്തില് ഓര്മ്മയാകുന്ന നാളുകളാണ് വരുന്നത്. പാര്ട്ടി അണികള് കൂട്ടത്തോടെ ബിജെപിയിലേക്ക് പലയിടത്തും വന്നതോടെ സിപിഎം ഓഫീസുകള് ബിജെപി ഓഫീസുകളായി മാറി. വരും നാളുകളില് കൂടുതല് സിപിഎം ഓഫീസുകള് ബിജെപി ഓഫീസുകളായി മാറാന് പോകുകയാണ്. അധികാരത്തില് ഒറ്റപ്പെട്ടുനിന്ന പിന്നോക്കവിഭാഗങ്ങളെ അധികാരത്തിന്റെ പൂമുഖത്തെത്തിക്കാന് ബിജെപി ശ്രമിക്കുന്നതാണ് എസ്എന്ഡിപിയോഗത്തിനെതിരെ പിണറായി ആരോപണം ഉന്നയിക്കുന്നതിന്റെ പിന്നില്. മുമ്പ് നരേന്ദ്രമോദിക്ക് ഭ്രഷ്ട് കല്പ്പിച്ചിരുന്ന ഉമ്മന്ചാണ്ടി സര്ക്കാര് കാര്യസാദ്ധ്യത്തിനായി ഇപ്പോള് ബിജെപി സര്ക്കാരിന് പിന്നാലെയാണ്. രാജ്യത്തിന്റെ വികസനമല്ല കുടുംബവാഴ്ച നിലനിര്ത്തുകയാണ് കോണ്ഗ്രസിന്റെ നയം. യുവതുര്ക്കിയെന്ന് വിശേഷിപ്പിക്കപ്പെടുന്ന രാഹുല്ഗാന്ധി പാര്ലമെന്റില് ഉറങ്ങുകയാണെന്നും ശ്രീനഗരി രാജന് പറഞ്ഞു.
യോഗത്തില് പഞ്ചായത്ത് കമ്മറ്റി പ്രസിഡന്റ് വിജു മണക്കാട്ട് അദ്ധ്യക്ഷത വഹിച്ചു. നിയോജകമണ്ഡലം പ്രസിഡന്റ് കെ.ജി. കണ്ണന് മുഖ്യപ്രഭാഷണം നടത്തി. മികച്ച പഞ്ചായത്തംഗത്തിനുള്ള രാജീവ് ഗാന്ധി പുരസ്കാരം നേടിയ ബിജെപി നഗരപാലിക സെല് സംസ്ഥാന ജോയിന്റ് കണ്വീനര് വി.എന്. മനോജിനെ ആദരിച്ചു. നിയോജകമണ്ഡലം ജനറല് സെക്രട്ടറി ടി.ബി. ബിനു, കെ.വി. നാരായണന്, ഉഷാകൃഷ്ണപിള്ള, രാജേഷ് കര്ത്ത, അനില് മാനമ്പള്ളി, എം.ജി. വിനോദ് തുടങ്ങിയവര് പ്രസംഗിച്ചു.
