ആലപ്പുഴ: ശ്രീകൃഷ്ണ ജയന്തി ബാലദിന ഘോഷങ്ങളുടെ ഭാഗമായി ബാലഗോകുലം ആലപ്പുഴ, ചെങ്ങന്നൂര് ജില്ലകളിലായി 500 കേന്ദ്രങ്ങളില് ഗോമാതാ പൂജയും, ഗോസംരക്ഷണ പ്രതിജ്ഞാ ചടങ്ങും സംഘടിപ്പിച്ചു .
കായംകുളം, ഹരിപ്പാട്, ചാരുംമൂട്, മാന്നാര്, മാവേലിക്കര, ചെങ്ങന്നൂര്, എടത്വ, കുട്ടനാട്, അമ്പലപ്പുഴ, ആലപ്പുഴ, കലവൂര്, ചേര്ത്തല, തുറവൂര്, പാണാവള്ളി എന്നീ താലൂക്ക് ആഘോഷസമിതികളാണ് ഗോമാതാ പൂജയ്ക്ക് നേതൃത്വം നല്കിയത്. ഗോപാലകൃഷ്ണന് എന്നാണ് ശ്രീകൃഷ്ണന്റെ അപരനാമം. ഗോക്കളെ പരിപാലിക്കുന്നത് പവിത്രമായ അവതാരധര്മ്മമായി ഭഗവാന് നമുക്ക് കാണിച്ചുതന്നു. അവതാരദൗത്യം ധര്മ്മസംരക്ഷണമാണ്.
ഗോസംരക്ഷണം ധര്മ്മസംരക്ഷണം തന്നെയാണെന്നും ഗോമാതാവ് ധര്മ്മത്തിന്റെ മൂര്ത്തിമദ്ഭാവമാണെന്നും ഭഗവാന് നമ്മെ പഠിപ്പിച്ചു. അതുകൊണ്ട് ധര്മ്മം സംരക്ഷിക്കാന് ആഗ്രഹിക്കുന്നവര് ഗോമാതാവിനെ സംരക്ഷിക്കണം എന്നും നമ്മുടെ പൈതൃകത്തെ ലോക രാഷ്ട്രങ്ങളുടെ മുന്പില് ഉയര്ത്തി പിടിക്കുമെന്നും ഗോമാംസം ഭക്ഷിക്കാതിരിക്കുകയും ഗോമാംസഭോജികളെ നിരുത്സാഹപ്പെടുത്തുവെന്നും എന്നതാണ് ബാലഗോകുലത്തിന്റെ ഗോവംശ സംരക്ഷണ പ്രതിജ്ഞയിലൂടെ ജനങ്ങള്ക്ക് നല്കിയ സന്ദേശം.
ഗോവിന്റെ ഗുണനിലവാരം ആയുര്വേദവിധിപ്രകാരം വളരെ പ്രകീര്ത്തിക്കപ്പെടുന്നു. പഞ്ചഗവ്യത്തിന്റെ ഔഷധവീര്യം അത്യുത്തമമായി ഗണിക്കപ്പെടുന്നു. ഗോവുമായി ബന്ധപ്പെട്ട എല്ലാ ഉത്പന്നങ്ങളും വളരെ ശ്രേഷ്ഠമാണ്. ഗോ ആധാരിത ചികിത്സാ സമ്പ്രദായം സമൂഹത്തില് വ്യാപകമായിരിക്കുന്നു.
പ്രതിവര്ഷം ഭക്ഷ്യ ആവശ്യത്തിനായി ഭാരതത്തില് ഒരുകോടിയില്പരം കാലികളെ കൊന്നൊടുക്കുന്നു. ഇത്തരത്തില് മുന്നോട്ടുപോയാല് നാലുപതിറ്റാണ്ടിനകം ഭാരതം ഗോരഹിത രാജ്യമായിത്തീരും. നമ്മുടെ സംസ്ക്കാരിക മൃഗമായ ഗോവംശനാശം ആര്ഷസംസ്ക്കാരത്തിന്റെ പതനത്തിനും കാരണമാകും. ആര്ഷസംസ്ക്കാരത്തിന്റെ തകര്ച്ച കാംക്ഷിക്കുന്നവരാണ് ഗോമാംസം വെച്ചുവിളമ്പി ഗോസംരക്ഷണ നിയമനിര്മ്മാണത്തിനെതിരെ ആഘോഷസമരം നടത്തുന്നത്. എല്ലാ ജീവജാലങ്ങളെയും പ്രകൃതിവിഭവങ്ങളെയും സംരക്ഷിക്കുക എന്ന ഭാരതീയ വീക്ഷണത്തിന്റെ പ്രായോഗിക കര്മ്മപദ്ധതി വളരെ സുചിന്തിതമാണ്.
ഗോമാതാവ് പ്രകൃതിയുടെ പ്രതീകമാണ്. മുപ്പത്തിമുക്കോടി ദേവതകളുടെ ഇരിപ്പിടമാണ് എന്നാണ് നമ്മുടെ സങ്കല്പ്പം. പാലും പാലുത്പന്നങ്ങളും ഉള്ളിടത്ത് കൃഷ്ണചൈതന്യം നടമാടുകയും മാംസാഹാരമുള്ളിടത്ത് രാക്ഷസീയഭാവം ഉടലെടുക്കുകയും ചെയ്യും. ഈ വിശ്വാസപ്രമാണത്തെ ശക്തിപ്പെടുത്തുന്നതാണ് ഇന്ന് നമ്മുടെ സമൂഹത്തില് നടന്നുകൊണ്ടിരിക്കുന്ന ദുഷ്പ്രവണതകള്. ഭാരതത്തിലെ ഒട്ടുമിക്ക സംസ്ഥാനങ്ങളിലും ഗോവധനിയന്ത്രണനിയമം നടപ്പാക്കിയപ്പോള്, കേന്ദ്രസര്ക്കാര് ഗോസംരക്ഷണനിയമം നടപ്പാക്കുന്നതിനെക്കുറിച്ച് അഭിപ്രായം ആരാഞ്ഞപ്പോള് കേരളാ ഭരണകൂടം അതിനെ എതിര്ക്കുകയും പ്രതിപക്ഷം ഗോമാംസമേള നടത്തി പ്രതിഷേധം ആഘോഷിക്കുകയും ചെയ്തു. കേരളത്തിന്റെ സാംസ്ക്കാരിക പൈതൃകത്തിന് വലിയ ആഘാതമാണ് ഈ നടപടികളേല്പ്പിച്ചതെന്ന് ബാലഗോകുലം സംസ്ഥാന വൈസ് പ്രസിഡന്റ് വി.ജെ. രാജ്മോഹന് പറഞ്ഞു. മാവേലിക്കര കണ്ടിയൂര് ശ്രീ മഹാദേവ ക്ഷേത്രത്തില് ഗോമാതാപൂജയുടെ ജില്ലാതല ഉദ്ഘാടനം നിര്വ്വഹിച്ച് സംസാരിക്കുകയായിരുന്നു അദ്ദേഹം.
സപ്തംബര് അഞ്ചു വരെ വിവിധ പരിപാടികളാണ് ബാലഗോകുലത്തിന്റെ ആഭിമുഖ്യത്തില് സംഘടിപ്പിച്ചിട്ടുള്ളത്. ഗോപൂജ കൂടാതെ , കഥാകഥനം, സാംസ്ക്കാരിക സമ്മേളനങ്ങള്, ഉറിയടി, പുരാണ പ്രശ്നോത്തരി ,വിവിധ കലാമത്സരങ്ങള് എന്നിവ നടത്തും. ശ്രീകൃഷ്ണ ജയന്തി ദിനത്തില് നാടൊട്ടുക്കും ശോഭായാത്രകള് നടക്കും.
