ആലപ്പുഴ: ഭാരതത്തെ ലോക രാഷ്‌ട്രങ്ങളുടെ മുന്നിലെത്തിക്കാനുള്ള പദ്ധതികള്‍ക്കും സാധാരണക്കാരായ ജനവിഭാഗത്തിന്റെ ക്ഷേമ പ്രവര്‍ത്തനങ്ങള്‍ക്കും കോണ്‍ഗ്രസ് തടസം നില്‍ക്കുകയാണെന്ന് ബിജെപി മഹാരാഷ്‌ട്ര എംപി ഗോപാല്‍ ഷെട്ടി കുറ്റപ്പടുത്തി. മോദി സര്‍ക്കാരിന്റെ വികസന പ്രവര്‍ത്തനങ്ങള്‍ക്കെല്ലാം കോണ്‍ഗ്രസ് തടസം സൃഷ്ടിക്കുകയാണ്. അനാവശ്യമായി പാര്‍ലമെന്റ് നടപടികള്‍ തടസപ്പെടുത്തുന്ന പ്രതിപക്ഷ എംപിമാരുടെ നിലപാടുകള്‍ക്കെതിരെ ബിജെപി അമ്പലപ്പുഴ നിയോജകമണ്ഡലം കമ്മറ്റിയുടെ നേതൃത്വത്തില്‍ കച്ചേരിമുക്കില്‍ നടത്തിയ പ്രതിഷേധസായാഹ്ന സമ്മേളനം ഉദ്ഘാടനം ചെയ്യുകയായിരുന്നു അദ്ദേഹം. കോണ്‍ഗ്രസും ഇടതുപക്ഷവും അടക്കമുള്ള പ്രതിപക്ഷം അനാവശ്യമായി പാര്‍ലമെന്റ് നടപടികള്‍ തടസപ്പെടുത്തുകയാണ്. ബിജെപി പ്രതിപക്ഷത്തായിരുന്നപ്പോള്‍ ലക്ഷം കോടികളുടെ അഴിമതികള്‍ക്കെതിരെയാണ് പാര്‍ലമെന്റ് തടസപ്പെടുത്തിയത്. മോദി സര്‍ക്കാര്‍ ഒരു വര്‍ഷത്തിനകം അഭിമാനിക്കാവുന്ന വികസന പദ്ധതികള്‍ നടപ്പാക്കി. രാഷ്‌ട്രീയ മുഖം നോക്കാതെ കേരളത്തിനും ഒട്ടേറെ പദ്ധതികള്‍ നല്‍കി. കേരള ജനതയും ബിജെപിക്ക് അനുകൂലമായി ചിന്തിക്കണമെന്നും അദ്ദേഹം അഭ്യര്‍ത്ഥിച്ചു. നിയോജകമണ്ഡലം പ്രസിഡന്റ് എല്‍.പി. ജയചന്ദ്രന്‍ അദ്ധ്യക്ഷത വഹിച്ചു. ജില്ലാ ജനറല്‍ സെക്രട്ടറി കൊട്ടാരം ഉണ്ണികൃഷ്ണന്‍, ജില്ലാ വൈസ് പ്രസിഡന്റ് പി.കെ. വാസുദേവന്‍, നിയോജകമണ്ഡലം ഭാരവാഹികളായ ഡി. പ്രദീപ്, പി. ലിജു, അനില്‍ പാഞ്ചജന്യം, വി. ബാബുരാജ്, വി.സി. സാബു, എസ്. ബൈജുകുമാര്‍, മോര്‍ച്ച പ്രസിഡന്റുമാരായ ആര്‍. കണ്ണന്‍, തുണ്ടില്‍ ബിജുുകമാര്‍, പി.എ. ഫ്രാന്‍സിസ്, എസ്. രമേശന്‍, ജില്ലാ കമ്മറ്റിയംഗങ്ങളായ വി. ശ്രീജിത്ത്, ഷാംജി പെരുവത്ര, കെ.പി. സുധാകരന്‍ പിള്ള, ഗ്രാമപഞ്ചായത്തംഗം ആര്‍. ശ്രീലേഖ എന്നിവര്‍ പ്രസംഗിച്ചു. എംപിയുടെ പ്രഭാഷണം എറണാകുളം ജില്ലാ വൈസ് പ്രസിഡന്റ് ടി. മുരളിധരന്‍ പരിഭാഷപ്പെടുത്തി.
പ്രതികരിക്കാൻ ഇവിടെ എഴുതുക