ആലപ്പുഴ: ഓണക്കാലത്ത് വിപണികളില്‍ വ്യാജനും വിഷം ചേര്‍ത്ത ഉത്പന്നങ്ങളും വ്യാപകമായി വിറ്റഴിക്കപ്പെടുന്നു. സ്ഥിരംകടകളില്‍ ഭക്ഷ്യസുരക്ഷാ ഉദ്യോഗസ്ഥരും ആരോഗ്യവിഭാഗവും മറ്റും പരിശോധന നടത്തുന്നതിനാല്‍ വഴിയോര കച്ചവടസ്ഥാപനങ്ങളിലാണ് ഇത്തരത്തിലുള്ള വില്‍പ്പന പൊടിപൊടിക്കുന്നത്. വിഷം ചേര്‍ത്ത പച്ചക്കറികളും പഴവര്‍ഗങ്ങളും വ്യാപകമായാണ് വഴിയോര കച്ചവടക്കാര്‍ വിറ്റഴിക്കുന്നത്. എന്നാല്‍ ഇവിടങ്ങളില്‍ യാതൊരുവിധ പരിശോധനകളും നടക്കുന്നില്ല. കഴിഞ്ഞ ദിവസം തോണ്ടന്‍കുളങ്ങരയ്‌ക്ക് വടക്ക് വശത്തെ വഴിയോരകച്ചവടക്കാരനില്‍ നിന്ന് വാങ്ങിയ ആപ്പിളുകള്‍ വിഷം കുത്തിവെച്ചതായിരുന്നു. ഒരു കിലോ ആപ്പിള്‍ 80 രൂപയ്‌ക്ക് വാങ്ങിയ ഉപഭോക്താവ് വീട്ടില്‍ ചെന്ന് മുറിച്ചപ്പോഴാണ് വിഷം കുത്തിവെച്ചതാണെന്ന് മനസ്സിലായത്. മുറിച്ച ആപ്പിളിന്റെ ഉള്‍ഭാഗം ചുവന്ന നിറത്തിലാകുകയായിരുന്നു. ഈ വിവരം ഭക്ഷ്യസുരക്ഷാ അധികൃതരെ അറിയിച്ചെങ്കിലും നടപടിയുണ്ടായില്ല. വഴിയോരങ്ങളിലെ പച്ചക്കറി വില്‍പ്പനയും ഇത്തരത്തില്‍ വിഷം കലര്‍ന്നവയാണെന്ന് പരാതികളുണ്ട്. വിലക്കുറവായതിനാല്‍ വാങ്ങുന്നവര്‍ പലരും തൂക്കത്തിലും കബളിപ്പിക്കപ്പെടുന്നു. കഴിഞ്ഞ ദിവസം വ്യാജ തേന്‍ വില്‍പ്പനക്കാരായ തമിഴ്‌നാട്ടുകാരെ പോലീസ് പിടികൂടിയിരുന്നു.
വിപണിയില്‍ വ്യാജനും വിഷംചേര്‍ത്തവയും വ്യാപകം
ബന്ധപ്പെട്ട വാര്‍ത്തകള്‍
പുതിയ വാര്‍ത്തകള്‍
ജന്മഭൂമി ഓണ്‍ലൈന്‍© Mathruka Pracharanalayam Limited.
Tech-enabled by Ananthapuri Technologies.