മൂഹമ്മ:ഐശ്വര്യത്തിന്റെയും സമൃദ്ധിയുടെയും ഗതകാല സ്മരണകള്‍ ഉണര്‍ത്തി വീണ്ടുമൊരു ഓണക്കാലമെത്തി. നന്മയുടെ നിറക്കാഴ്ചകളുമായി എത്തുന്ന പൊന്നോണത്തെ പൂവിളിയുയര്‍ത്തിയും പൂക്കളമൊരുക്കിയും വരവേല്‍ക്കാന്‍ ഗ്രാമങ്ങള്‍ അണിഞ്ഞൊരുങ്ങി. അത്ത ദിനത്തോടെ ആരംഭിച്ച ഓണാഘോഷ പരിപാടികള്‍ ഇനി ചതയ ദിനത്തോടെയാണ് സമാപിക്കുക. വിപുലമായ ആഘോഷ പരിപാടികളാണ് നാടെങ്ങുമുള്ള വായനശാല കമ്മറ്റികളും സാംസ്‌ക്കാരിക ക്ലബ്ബുകളും സംഘടിപ്പിച്ചിരിക്കുന്നത്. കാവുങ്കല്‍ ഗ്രാമീണ ആര്‍ട്‌സ് ആന്റ് സ്‌പോര്‍ട്‌സ് ക്ലബ്ബിന്റെ 40-ാമത് അഖില കേരള ഫുട്‌ബോള്‍ ടൂര്‍ണമെന്റും ഓണാഘോഷവും വിവിധ പരിപാടികളോടെ ആരംഭിച്ചു. കാവുങ്കല്‍ ക്ഷേത്രമൈതാനിയില്‍ ഫുട്‌ബോള്‍ ടൂര്‍ണമെന്റ് കെ. സി. വേണുഗോപാല്‍ എംപി ഉദ്ഘാടനം ചെയ്തു. ഗ്രാമീണ ക്ലബ്ബ് രക്ഷാധികാരി സി. പി. രവീന്ദ്രന്‍ അധ്യക്ഷത വഹിച്ചു. 27ന് രാത്രി 7.30ന് ആലപ്പുഴ സംസ്‌കൃതിയുടെ വിഷ്വല്‍ഗാനമേള, 28ന് രാത്രി 7.30ന് എലവന്റ്‌സ് ഓഫ് ജ്യോതിയുടെ നാടന്‍പാട്ടും വഞ്ചിപ്പാട്ടും. 29ന് രാത്രി 7.30ന് കവിയരങ്ങ്. 30ന് രാത്രി 7ന് വട്ടക്കളി,തിരുവാതിരകളി,കുട്ടികളുടെ കലാമല്‍സരങ്ങള്‍ എന്നിവ സംഘടിപ്പിക്കും.
31ന് രാത്രി 7ന് നടക്കുന്ന സമാപന സമ്മേളനം ജില്ലാപഞ്ചായത്ത് പ്രസിഡന്റ് അഡ്വ:യു പ്രതിഭാഹരി ഉദ്ഘാടനം ചെയ്യും. ക്ലബ്ബ് പ്രസിഡന്റ് കെ ജി സുജിത്ത് അധ്യക്ഷത വഹിക്കും. വിജയികള്‍ക്ക് കലവൂര്‍ എന്‍ ഗോപിനാഥ് സമ്മാനങ്ങള്‍ വിതരണം ചെയ്യും.
മണ്ണഞ്ചേരി വൈ എം എ ഗ്രന്ഥശാല ആന്റ് വായനശാലയുടെ ഓണാഘോഷം 29,30 തീയതികളില്‍ നടക്കും.തീറ്റമല്‍സരം,കയര്‍പിരി,കസേരകളി,സൂചിയുംനൂലും കോര്‍ക്കല്‍,ഡാന്‍സ്,സാംസ്‌ക്കാരിക സമ്മേളനം എന്നിവ സംഘടിപ്പിക്കും.29ന് രാവിലെ 9ന് നടക്കുന്ന ജില്ലാതല ക്യാരംസ് മല്‍സരം കെ വി മേഘനാഥനും 30ന് വൈകിട്ട് 5ന് നടക്കുന്ന സാംസ്‌ക്കാരിക സമ്മേളനം മണ്ണഞ്ചേരി ഗ്രാമപഞ്ചായത്ത് പ്രസിഡന്റ് പി എ ജുമൈലത്തും ഉദ്ഘാടനം ചെയ്യും.
ക്ലബ്ബ് പ്രസിഡന്റ് സി ജെ സിബിച്ചന്‍ അധ്യക്ഷത വഹിക്കും. ആലപ്പി വിവേകാനന്ദന്‍ സമ്മാനങ്ങള്‍ വിതരണം ചെയ്യും. തെക്കനാര്യാട് വി വി ആര്‍ എച്ച്,എസ് എല്‍ പുരം കണ്ണര്‍കാട് ജ്വാലവായനശാല,കല്ലാപ്പുറം സന്മാര്‍ഗസന്ദായിനി,ചാരമംഗലം കായിക്കര നവഭാവന,കഞ്ഞിക്കുഴി വെമ്പള്ളി പ്രോഗ്രസീവ് വായനശാല ക്ലബ്ബ് എന്നിവയും ഓണാഘോഷം വിവിധ പരിപാടികളടെ സംഘടിപ്പിക്കുന്നുണ്ട്.
ചേര്‍ത്തല: വെള്ളിയാകുളം ഗവ.യുപി സ്‌കൂളിലെ ഓണാഘോഷം ജില്ലാ പഞ്ചായത്ത് പ്രസിഡന്റ് അഡ്വ.യു. പ്രതിഭാ ഹരി ഉദ്ഘാടനം ചെയ്തു. പുതിയതായി രൂപികരിച്ച ബാന്‍ഡ് സെറ്റ് ഗ്രൂപ്പിന്റെ ഉദ്ഘാടനം തണ്ണീര്‍മുക്കം പഞ്ചായത്ത് പ്രസിഡന്റ് കെ. പത്മാവതിയമ്മ നിര്‍വഹിച്ചു. സുനില്‍കുമാര്‍ തെക്കേപേരേവെളി ബാന്‍ഡ് സെറ്റ് സ്‌കൂളിന് സമര്‍പ്പിച്ചു. പഞ്ചായത്ത് അംഗം വെള്ളിയാകുളം പരമേശ്വരന്‍ അദ്ധ്യക്ഷത വഹിച്ചു. വാരനാട് സര്‍വീസ് സഹകരണ ബാങ്ക് പ്രസിഡന്റ് എന്‍.കെ. ഹരിഹരപ്പണിക്കര്‍, പിടിഎ പ്രസിഡന്റ് കെ.എന്‍. പുഷ്പന്‍, ഹെഡ്മാസ്റ്റര്‍ ഡി. സാബു, പ്രവീണ്‍.ജി. പണിക്കര്‍, ബി. അംബികാദേവി എന്നിവര്‍ സംസാരിച്ചു.
ശ്രീനാരായണ ധര്‍മ സഭയുടെ ആഭിമുഖ്യത്തില്‍ ഓണത്തോടനുബന്ധിച്ച് സ്‌നേഹ സന്ദേശ കിറ്റ് വിതരണം നടത്തി. നീലിമംഗലത്ത് ചേര്‍ന്ന യോഗത്തില്‍ പ്രസിഡന്റ് സി.വി. വേണുഗോപാല്‍ അദ്ധ്യക്ഷത വഹിച്ചു. എന്‍.കെ.കരുണാകരന്‍, കെ.പി. അനില്‍കുമാര്‍, കെ.ആര്‍. മോഹനന്‍, കെ.പി. മോഹനന്‍, അഴിമുഖം ചന്ദ്രബോസ്, ടി.കെ. രമേശന്‍ എന്നിവര്‍ സംസാരിച്ചു.
