വാഷിങ്ടണ്‍: വിദേശത്തെ ബാങ്കുകളില്‍ നിക്ഷേപിച്ചിരിക്കുന്ന 125 ലക്ഷം കോടിരൂപയുടെ കള്ളപ്പണം തിരികെ കൊണ്ടുവരാന്‍ ഭാരത സര്‍ക്കാരിനാകുമെന്ന് ബിജെപി നേതാവ് സുബ്രഹ്മണ്യന്‍ സ്വാമി വിശ്വാസം പ്രകടിപ്പിച്ചു. വിര്‍ജിനിയയില്‍ ഭാരത-അമേരിക്കന്‍ സംഘമായ ലീഡ് ഇന്ത്യ 2020ന്റെ ഡോ. എ.പി.ജെ. അബ്ദുള്‍ കലാം അനുസ്മരണ ചടങ്ങില്‍ സംസാരിക്കുകയായിരുന്നു അദ്ദേഹം.
”പ്രധാനമന്ത്രി മോദിയുടെ സ്വഭാവം വെച്ചു നോക്കുമ്പോള്‍ ഞാന്‍ വളരെ വിശ്വസിക്കുന്നു, കള്ളപ്പണം തിരികെ കൊണ്ടുവരാനാകും,” സ്വാമി പറഞ്ഞു. വൈകാതെ ഇതു സംബന്ധിച്ച് സര്‍ക്കാര്‍ നടപടിയുടെ സ്ഥിതിഗതി വിവരിച്ചേക്കുമെന്നും സ്വാമി പറഞ്ഞു.
ഭാരതത്തിന് ഉറച്ച സാമ്പത്തിക പരിഷ്‌കരണങ്ങളിലൂടെ 12 ശതമാനം സാമ്പത്തിക വളര്‍ച്ച നേടാനുള്ള സാഹചര്യങ്ങളുണ്ട്. അതിനു വേണ്ടത് ജനങ്ങളെ പ്രചോദിപ്പിക്കുകയാണ്. പ്രധാനമന്ത്രിയുടെ നയപരിപാടികള്‍ നടപ്പിലാക്കേണ്ട ഉദ്യോഗസ്ഥവൃന്ദം പഴയ നയം പിന്തുടര്‍ന്നവരാണ്. മുന്‍പ്രധാനമന്ത്രി നരസിംഹ റാവുവിന്റെ സാമ്പത്തിക പരിഷ്‌കരണ നയങ്ങള്‍ ഇന്നത്തെ വികസനത്തിന് ഏറെ സഹായകമായെന്നും സ്വാമി പറഞ്ഞു.
കഴിഞ്ഞ പാര്‍ലമെന്റ് സമ്മേളനം അലങ്കോലപ്പെടുത്തിയതിന് പ്രതിപക്ഷത്തെ കുറ്റപ്പെടുത്തിയ സ്വാമി, പ്രതിപക്ഷത്തോടു മൃദു സമീപനം കൊണ്ടുകാര്യമില്ലെന്നും പ്രധാനമന്ത്രി ഇതില്‍നിന്ന് പാഠം ഉള്‍ക്കൊള്ളുമെന്നു കരുതുന്നുവെന്നും പറഞ്ഞു.
