മാന്നാര്: ഭരണകക്ഷി നേതാക്കളുടെ താളത്തിനൊപ്പം തുള്ളാത്തതിന് മാന്നാര്, ചെങ്ങന്നൂര് എസ്ഐമാര്ക്ക് സ്ഥലമാറ്റം. മാന്നാര് എസ്ഐ: എസ്. ശ്രീകുമാറിനെ എടത്വയിലേക്കും, ചെങ്ങന്നൂര് എസ്ഐ എസ്.ആര്. നെറ്റോയെ ആലപ്പുഴ ഡിസിആര്ബിയിലേക്കുമാണ് മാറ്റിയത്.
മാന്നാറില് ഗുണ്ടാ, മാഫിയ സംഘങ്ങള്ക്കെതിരെ കര്ശന നിലപാടുകള് സ്വീകരിച്ച എസ്ഐ ശ്രീകുമാറിനെ സ്ഥലം മാറ്റുന്നതിനു പിന്നില് ആഭ്യമന്തരമന്ത്രി രമേശ് ചെന്നിത്തലയുമായി അടുപ്പമുള്ള ചില നേതാക്കളാണെന്നാണ് ആരോപണം. ഭരണകക്ഷിയിലെ ചില നേതാക്കളുടെ വഴിവിട്ട ശുപാര്ശകള്ക്ക് വഴങ്ങാതിരുന്നതാണ് ഇവരുടെ അപ്രീതിക്ക് കാരണമായത്.
ചെങ്ങന്നൂരില് മൂന്നുമാസം മുന്പാണ് എസ്.ആര്. നെറ്റോ ചാര്ജെടുക്കുന്നത്. കഴിഞ്ഞ ദിവസം കോണ്ഗ്രസ് എ വിഭാഗം സംസ്ഥാന നേതാവിന്റെ ശുപാര്ശ പാലിക്കാതിരുന്നതാണ് എസ്ഐയെ സ്ഥലം മാറ്റാന് കാരണം. വര്ഷങ്ങള് മുന്പ് പൊളിച്ചു നീക്കിയ വാഹനത്തിന്റെ വ്യാജ ആര്സി ബുക്ക് നിര്മ്മിക്കാന് സഹായിക്കണമെന്ന ശുപാര്ശയാണ് എസ്ഐ തള്ളിയത്. ഇതില് ക്ഷുഭിതനായ നേതാവിന്റെ തുടര് കളികളാണ് എസ്ഐയുടെ സ്ഥലം മാറ്റത്തില് കലാശിച്ചത്. ഭരണകക്ഷി നേതാക്കളുടെ വഴിവിട്ട നീക്കങ്ങള്ക്ക് സഹായിക്കാത്ത ഉദ്യോഗസ്ഥരെ സ്ഥലം മാറ്റുന്ന ആഭ്യന്തരവകുപ്പിന്റെ നിലപാടുകള്ക്കെതിരെ പോലീസ് സേനയ്ക്കുള്ളില് വ്യാപക പ്രതിഷേധമാണ് ഉയര്ന്നിരിക്കുന്നത്.
