ചേര്ത്തല: ചേര്ത്തലയില് ആര്എസ്എസ് പ്രവര്ത്തകര്ക്കുനേരെ സിപിഎം, ഡിവൈഎഫ്ഐ ഗുണ്ടകളുടെ അഴിഞ്ഞാട്ടം വീണ്ടും. മാരകായുധങ്ങളുമായി എത്തിയ സംഘം പ്രദേശത്തെ സമാധാന അന്തരീക്ഷം തകര്ക്കുവാന് ശ്രമിക്കുന്നതായി നാട്ടുകാര്. ഏപ്രില് ഒന്നിന് ഉച്ചയോടെയാണ് ചേര്ത്തല തെക്ക് മാടയ്ക്കല് കവലയില് ആര്എസ്എസ് മണ്ഡല് കാര്യവാഹ് രഞ്ജിത്ത്, ശാരീരിക് ശിക്ഷണ് പ്രമുഖ് യദുകൃഷ്ണന് എന്നിവരെ ആക്രമിക്കുവാന് ശ്രമം നടന്നത്. മാരകായുധങ്ങളുമായെത്തിയ ഗുണ്ടകളില് നിന്ന് ഇവര് ഓടി രക്ഷപ്പെടുകയായിരുന്നു.
മാടയ്ക്കല്, കുറുപ്പംകുളങ്ങര മേഖലയില് ആര്എസ്എസ് പ്രവര്ത്തകര്ക്കുനേരെ സിപിഎം അക്രമം നടത്തുന്നത് പതിവായിട്ടും പോലീസ് പ്രതികള്ക്കെതിരെ ശക്തമായ നടപടിയെടുക്കുന്നില്ലെന്ന ആക്ഷേപം ശക്തമാണ്. ആര്എസ്എസ് കാര്യവാഹ് ഉള്പ്പെടെയുള്ളവരുടെ വീടുകള് തല്ലിത്തകതര്ത്ത കേസിലെ അതേ പ്രതികള് തന്നെയാണ് ഇന്നലെയും ആക്രമണം നടത്തിയത്. സിപിഎം-ഡിവൈഎഫ്ഐക്കാരായ റെജി വിജയന്, അനി വിജയന്, മനോജ്, അനിക്കുട്ടന്, രഞ്ജിത്ത് തുടങ്ങിയവരുടെ നേതൃത്വത്തിലുള്ള സംഘമാണ് ഇതിനുപിന്നിലെന്ന് ദൃക്സാക്ഷികള് പറഞ്ഞു.
കഴിഞ്ഞ ദിവസം ചേര്ത്തല പൂരത്തിനോടനുബന്ധിച്ചുള്ള പടയണി നടക്കുമ്പോള് സിപിഎം ഗുണ്ടകള് ഭീഷണിയുമായി എത്തിയിരുന്നു. തുടര്ന്ന് പോലീസ് ഇടപെട്ടാണ് ഇവരെ പറഞ്ഞയച്ചത്. ക്ഷേത്ര ഉത്സവങ്ങളുടെ മറവില് ആര്എസ്എസ് പ്രവര്ത്തകര്ക്കുനേരെ ആക്രമണം നടത്തി ഉത്സവങ്ങള് അലങ്കോലമാക്കുവാനുള്ള ശ്രമമാണ് സിപിഎം നടത്തുന്നത്. അക്രമികള്ക്കെതിരെ ചേര്ത്തല പോലീസ് കേസെടുത്തു.
