മണ്ണഞ്ചേരി: ജനങ്ങള് തിങ്ങിപാര്ക്കുന്ന പൊന്നാട് പള്ളിമുക്കിന് സമീപം സ്വകാര്യ മൊബൈല് ടവര് നിര്മ്മാണം നാട്ടുകാര് തടഞ്ഞു. പ്രദേശവാസിയായ വ്യക്തി വീട് നിര്മ്മാണത്തിനായി ഫൗണ്ടേഷന് കെട്ടുന്നു എന്ന വ്യാജേനയാണ് നിര്മ്മാണം ആരംഭിച്ചതെന്ന് നാട്ടുകാര് പറഞ്ഞു. ഇന്നലെയാണ് നിര്മ്മാണപ്രവര്ത്തനങ്ങള് മൊബൈല് ടവറിനാണെന്ന് നാട്ടുകാര്ക്ക് ബോദ്ധ്യമായത് തുടര്ന്ന് പ്രദേശവാസികള് സംഘടിച്ച് പ്രവര്ത്തനം തടസപ്പെടുത്തുകയും എഴുപതോളം കുടുംബങ്ങള് ചേര്ന്ന് പഞ്ചായത്ത് അധികൃതര്ക്ക് പരാതിയും നല്കി.
എന്നാല് നിര്മ്മാണപ്രവര്ത്തനങ്ങള് നടത്താനുള്ള അനുവാദം നല്കിയതായുള്ള പഞ്ചായത്തിന്റെ രേഖകള് ടവര് നിര്മ്മിക്കാനെത്തിയവര് സമ്പാദിച്ചതായി അറിയുന്നു. ജനങ്ങളുടെ ആരോഗ്യത്തെ ബാധിക്കുന്ന ഒരു നിര്മ്മാണപ്രവര്ത്തനങ്ങളും നടത്താന് അനുവദിക്കില്ലെന്ന ഉറച്ച തീരുമാനത്തിലാണ് നാട്ടുകാര്. സമരം ശക്തമാക്കുന്നതിന്റെ ഭാഗമായി മാര്ച്ച് 19ന് ജനകീയ സമരസമിതി രുപീകരണയോഗം പൊന്നാട് ചേരും.
