മാവേലിക്കര: നിര്ത്തിയിട്ടിരുന്ന സ്വകാര്യ ബസിനു പിന്നില് ടിപ്പര് ലോറി ഇടിച്ച് അന്യസംസ്ഥാന തൊഴിലാളികള് ഉള്പ്പെടെ മൂന്നുപേര്ക്ക് പരിക്ക്. ടിപ്പര് ലോറി ഡ്രൈവര് തോനയ്ക്കാട് കുറ്റിക്കാട്ടില് പ്രശാന്ത് (26), തൊഴിലാളികളായ ബംഗാള് സ്വദേശികളായ സുമന്, ഹല്മര് എന്നിവര്ക്കാണ് പരിക്കേറ്റത്. പ്രശാന്തിനെയും സുമനെയും വണ്ടാനം മെഡിക്കല് കോളേജ് ആശുപത്രിയിലും ഹല്മറിനെ ഇടപ്പോണ് സ്വകാര്യ ആശുപത്രിയിലും പ്രവേശിപ്പിച്ചു.
മാര്ച്ച് 15ന് വൈകിട്ട് മൂന്നിന് വെട്ടിയാര് രണ്ടുനില ജങ്ഷനിലായിരുന്നു അപകടം. മാവേലിക്കരയില് നിന്നും പന്തളം ഭാഗത്തേക്ക് പോയ അനില്മോന് ബസ് ആളിനെ ഇറക്കാനായി നിര്ത്തിയപ്പോള് പിന്നാലെ എത്തിയ ടിപ്പര്ലോറി ഇടിയ്ക്കുകയായിരുന്നു. ലോറിയുടെ മുന്നില് ഇരുന്നവര്ക്കാണ് പരിക്കേറ്റത്. ലോറിയുടെ പിന്നില് ഇന്റര് ലോക്ക് ടൈല്സിന്റെ മുകളില് മൂന്നു തൊഴിലാളികള് ഉണ്ടായിരുന്നു. ഇവര്ക്ക് പരിക്കേറ്റില്ല. ഞായറാഴ്ച ആയതിനാല് ബസിനുള്ളില് ആളു കുറവായിരുന്നു. ഇതിനാലാണ് അപകടത്തിന്റെ തീവ്രത കുറഞ്ഞത്.
