പ്രാര്ത്ഥിക്കുന്നതു ഭഗവാനുവേണ്ടി മാത്രമായിരിക്കണം. എങ്കിലേ പൂര്ണമായ സംതൃപ്തി നേടുവാന് കഴിയൂ. ശര്ക്കരയില് എന്തുചെന്നു വീണാലും അതു മധുരമായിത്തീരുന്നു. അതുപോലെ ഈശ്വരന്റെ സാമീപ്യത്തില് നമുക്കു കിട്ടുന്നത് ആനന്ദം മാത്രമാണ്. റാണീച്ചയെ മാത്രം പിടിച്ചാല് മതി മറ്റുള്ള ഈച്ചകളൊക്കെ കൂടെപ്പോരും. ഈശ്വരനെ ആശ്രയിച്ചാല് ആദ്ധ്യാത്മികവും ഭൗതികവും ആയ സര്വ്വ നേട്ടങ്ങളുമുണ്ടാകും.
ആഗ്രഹങ്ങള് സാധിക്കുവാന്വേണ്ടി ഈശ്വരനെ ആശ്രയിക്കുന്നവര്ക്ക് അവ സഫലമായാല് ഈശ്വരനിലുള്ള ഭക്തിയും വിശ്വാസവും വര്ദ്ധിക്കും. സാധിച്ചില്ലെങ്കിലോ, ഉള്ള വിശ്വാസംകൂടി നഷ്ടമാകും. എല്ലാവരുടെയും ആഗ്രഹങ്ങള് സാധിച്ചു കൊടുക്കുവാന് എങ്ങനെ കഴിയും. ഒരു ഡോക്ടര് ആഗ്രഹിക്കുന്നത് എനിക്ക് ദിവസവും ധാരാളം രോഗികളെ കിട്ടണമെന്നാണ് അതിനുവേണ്ടി സദാ ഈശ്വരനോടു പ്രാര്ത്ഥിക്കുകയും ചെയ്യും.
രോഗികളെ കിട്ടിയില്ലെങ്കില് അദ്ദേഹത്തിന് ഈശ്വരനിലുള്ള വിശ്വാസം നഷ്ടമാകില്ലേ? അതേസമയം രോഗികളുടെ പ്രാര്ത്ഥന ‘ഈശ്വരാ, ഞങ്ങളെ ഇനിയും രോഗികളാക്കരുതേ, ഞങ്ങള്ക്കുള്ള രോഗങ്ങള് തീര്ത്തുതരണേ’ എന്നാണ്. ഒരാള് ശവം കൊണ്ടുവരാന്വേണ്ടി ഒരു വണ്ടി വാങ്ങി. ദിവസവും അയാളുടെ പ്രാര്ത്ഥന ‘ മുടക്കം കൂടാതെ ശവം കിട്ടണേ’ എന്നാണ്.
ശവപ്പെട്ടി വില്പ്പനക്കാരന്റെ പ്രാര്ത്ഥനയും അതുതന്നെ. അതേസമയം ജീവിച്ചിരിക്കുന്നവരുടെ പ്രാര്ത്ഥനയോ? ഒരിക്കലും മരിക്കല്ലേ എന്നുമാണ്. എങ്ങനെ ഇരുകൂട്ടരുടെയും ആഗ്രഹം ഒരേസമയം സാധിച്ചുകൊടുക്കുവാന് കഴിയും? ഒരു വക്കീല് ദിവസവും കേസു കിട്ടുവാന്വേണ്ടി പ്രാര്ത്ഥിക്കുന്നു. എന്നാല് ജനങ്ങളുടെ പ്രാര്ത്ഥന കേസിലൊന്നും ചെന്നുപെടല്ലേ എന്നാണ്. ഇതുപോലെ അനേകം വൈരുദ്ധ്യങ്ങള് നിറഞ്ഞതാണ് ഈ ലോകം.
എല്ലാവരുടെയും ആഗ്രഹങ്ങള് ഒരുപോല സാധിച്ചു കിട്ടുക പ്രയാസമാണ്. വൈരുദ്ധ്യം നിറഞ്ഞ ഈ ലോകത്തില് സംതൃപ്തിയോടും സമാധാനത്തോടുംകൂടി ജീവിക്കുവാന് പ്രയാസമില്ല. ആദ്ധ്യാത്മികതത്ത്വങ്ങള് മനസ്സിലാക്കി അതനുസരിച്ചു ജീവിച്ചാല് മതി.
