ശ്രീനഗര്: ഈ വര്ഷത്തെ അമര്നാഥ് തീര്ത്ഥാടനത്തിന് തുടക്കമായി. ജമ്മു-കശ്മീര് ലഫ്. ഗവര്ണര് മനോജ് സിന്ഹ അമര്നാഥ് ഗുഹാക്ഷേത്രത്തില് പരമ്പരാഗത ‘പ്രഥമ പൂജ’ നിര്വഹിച്ചു.
എല്ലാ വര്ഷവും തീര്ത്ഥാടനത്തിന് മുന്നോടിയായി നടത്തിവരുന്ന പ്രധാന ആചാരമാണ് ‘പ്രഥമ പൂജ’. തീര്ത്ഥാടനം ജൂലൈ 3ന് ആരംഭിക്കും. 57 ദിവസത്തെ യാത്ര രക്ഷാബന്ധന് ദിനമായ ആഗസ്ത് 28ന് സമാപിക്കും. അനന്ത്നാഗ് ജില്ലയിലെ പഹല്ഗാം പാതയിലൂടെയും ഗന്ദര്ബാല് ജില്ലയിലെ ബാല്താല് പാതയിലൂടെയും ഒരേസമയം തീര്ത്ഥാടനം നടക്കും. ഭീകര ഭീഷണികളുടെ പശ്ചാത്തലത്തില് ചരിത്രത്തിലെ ഏറ്റവും ശക്തമായ സുരക്ഷാ സംവിധാനമാണ് ഇത്തവണ തീര്ത്ഥാടനത്തിനായി ഒരുക്കിയിരിക്കുന്നത്.
സൈന്യം, സിആര്പിഎഫ്, ജമ്മു-കശ്മീര് പോലീസ് എന്നിവയുടെ നേതൃത്വത്തിലുള്ള സുരക്ഷാ വലയമാണ് തീര്ത്ഥാടന പാതകളില് സജ്ജമാക്കിയിരിക്കുന്നത്. തീര്ത്ഥാടകരുടെ ആദ്യ സംഘം ജൂലൈ 2ന് ജമ്മുവിലെ ഭഗവതി നഗര് ബേസ് ക്യാമ്പില് നിന്ന് ലഫ്. ഗവര്ണര് മനോജ് സിന്ഹയുടെ നേതൃത്വത്തില് ഔദ്യോഗികമായി ഫ്ളാഗ് ഓഫ് ചെയ്യും.
