തുറവൂര്: കെഎസ്ആര്ടിസി ബസിന് സൈഡുകൊടുക്കാത്തതിനെ ചൊല്ലിയുണ്ടായ തര്ക്കത്തെ തുടര്ന്ന് ബസ് യാത്രികനെ ഒരു സംഘം ആക്രമിച്ചു. സംഭവംകണ്ടുനിന്ന നാട്ടുകാര് അക്രമികളെ കൈകാര്യചെയ്തു. കാവില്-വളമംഗലം റോഡില് പത്മശാലിയ സംഘത്തിനു സമീപം ചൊവ്വാഴ്ച ഉച്ചയ്ക്ക് ഒന്നരയ്ക്കായിരുന്നു സംഭവം. ചേര്ത്തലയില് നിന്ന് തോപ്പുംപടിയിലേക്കു പോകുകയായിരുന്നു ബസ്. റോഡില് കാര് നിര്ത്തിയിട്ടിരുന്നതിനാല് ബസിന് കടന്നുപോകാന് കഴിഞ്ഞില്ല. ബസിന്റെ ഡ്രൈവര് ഏറെനേരം ഹോണ് അടിച്ചെങ്കിലും കാര് മാറ്റാന് യുവാക്കള് തയാറായില്ല. ഇതിനെതിരെ പ്രതികരിച്ചയാളെ നാലംഗ സംഘം ആക്രമിക്കുകയായിരുന്നു.
നാട്ടുകാരെത്തി കൈകാര്യം ചെയ്തതിനെ തുടര്ന്ന് അക്രമി സംഘം ഓടിരക്ഷപ്പെട്ടു. ഉത്സവപരിപാടിക്ക് കത്തിക്കാന് കൊണ്ടുപോയ വെടിക്കെട്ടു സാമഗ്രികളാണ് കാറിലുണ്ടായിരുന്നത്. പിന്നീട് നാട്ടുകാരായ ചിലരെ ആക്രമിക്കുന്നതിനായി മാരകായുധങ്ങള് വേണമെന്നാവശ്യപ്പെട്ട് സംഘം പഴമ്പിള്ളിക്കാവിലെ മറ്റൊരാളുടെ വീട്ടില് എത്തിയത് വീണ്ടും അടിപിടിക്ക് കാരണമായതായി നാട്ടുകാര് പറഞ്ഞു. വെടിക്കെട്ടു സാമഗ്രികള് നിറച്ച കാര് കുത്തിയതോട് പോലീസ് കസ്റ്റഡിയിലെടുത്തു.
