പള്ളൂരുത്തി: കുമ്പളങ്ങി-എഴുപുന്ന പാലം തുറന്നതോടെ കുമ്പളങ്ങി, പെരുമ്പടപ്പ് റൂട്ടില് വാഹനങ്ങളുടെ എണ്ണം വര്ദ്ധിച്ചു. കുമ്പളങ്ങി മുതല് പെരുമ്പടപ്പ് വരെയുള്ള ഇടുങ്ങിയ റോഡിലൂടെ വാഹനങ്ങളുടെ അമിതവേഗത നിരവധി അപകടങ്ങള്ക്കും കാരണമായി. കഴിഞ്ഞ ഒരുമാസത്തിനുള്ളില് പെരുമ്പടപ്പ്, കുമ്പളങ്ങി റോഡില് 12 ഓളം അപകടങ്ങള് നടന്നതായാണ് പ്രാഥമിക വിവരം. സ്വകാര്യ ബസ്സുകള്ക്ക് പുറമെ, കെഎസ്ആര്ടിസിയുടെ 14 ഓളം പുതിയ ബസ്സുകള്ക്ക് ഇതുവഴി പെര്മിറ്റ് അനുവദിച്ചിട്ടുണ്ട്. ഇരുചക്രവാഹനക്കാരും അമിതവേഗതയിലാണ് ഇതുവഴി പായുന്നത്.
കെഎസ്ആര്ടിസിയുടെ ദീര്ഘദൂര റൂട്ടുകളും ഇതുവഴി തിരിച്ചുവിടാന് തീരുമാനമായിട്ടുണ്ട്. കഴിഞ്ഞ നവംബര് 28ന് മുന് പ്രധാനമന്ത്രി മന്മോഹന്സിംഗ് കുമ്പളങ്ങിയില് എത്തിയ സമയത്ത് പെരുമ്പടപ്പ് റോഡിലെയും കുമ്പളങ്ങിയിലെയും മുഴുവന് ഹമ്പുകളും എടുത്തുമാറ്റിയത് വാഹനങ്ങളുടെ അമിതവേഗതയ്ക്ക് കാരണമായിട്ടുണ്ട്. നീക്കംചെയ്ത ഹമ്പുകള് പുനസ്ഥാപിക്കണമെന്ന് നാട്ടുകാര് അധികൃതതോട് ആവശ്യപ്പെട്ടു.
