ബസ് കാത്തുനില്പു പുരയിലേക്ക് ഇടിച്ചുകയറി സ്കൂള് ബസ്
കലവൂര്: റവന്യു ജില്ലാ സ്കൂള് കലോത്സവത്തില് പങ്കെടുക്കാന് പോയ സ്കൂള് ബസ് നിയന്ത്രണം വിട്ട് ബസ് കാത്തുനില്പു പുരയില് ഇടിച്ചു. ബസ് കാത്തുനിന്ന മൂന്നുപേര്ക്ക് പരിക്കേറ്റു. ഇവരെ ജനറല് ആശുപത്രിയില് പ്രവേശിപ്പിച്ചു. ആരുടെയും പരിക്ക് ഗുരുതരമല്ല.
മണ്ണഞ്ചേരി 13-ാം വാര്ഡ് കല്ലുപ്പാടത്ത് ബാബുവിന്റെ മകള് രാഖി, മണ്ണഞ്ചേരി 12-ാം വാര്ഡ് കണ്ടത്തില് രാജീവിന്റെ മകള് രേഷ്മ എന്നീ സ്കൂള് വിദ്യാര്ത്ഥികള്ക്കും മാരാരിക്കുളം തെക്കുപഞ്ചായത്ത് സ്വദേശി തങ്കമ്മയുടെ മകള് രശ്മി എന്നിവര്ക്കാണ് പരിക്കേറ്റത്. താമരക്കുളം ചത്തിയറ വിഎച്ച്എസ്എസിലെ 36 കുട്ടികളും ആറ് അദ്ധ്യാപകരും സഞ്ചരിച്ചിരുന്ന സ്കൂള് ബസാണ് അപകടത്തില്പ്പെട്ടത്. ഇടിയുടെ ആഘാതത്തില് ബസ് കാത്തുനില്പു പുരയുടെ കോണ്ക്രീറ്റ് തൂണുകള് തകര്ന്നു. ബസിനും കേടുപാടുകള് സംഭവിച്ചു.
സംഭവം നടക്കുമ്പോള് ആലപ്പുഴ-കലവൂര് റൂട്ടില് സര്വീസ് നടത്തുന്ന സ്വകാര്യ ബസ് സ്റ്റോപ്പില് ആളെ കയറ്റുകയായിരുന്നു. സ്വകാര്യ ബസില് നിന്നിറങ്ങിയ സ്ത്രീയാണ് രശ്മി. സംഭവമുണ്ടായ ഉടനെ സ്കൂള് ബസിലെ ഡ്രൈവര് ഓടി രക്ഷപെട്ടു. വിദ്യാര്ത്ഥികളെയും അദ്ധ്യാപകരെയും മറ്റൊരു ബസില് കയറ്റി ചേര്ത്തലയ്ക്കയച്ചു. മണ്ണഞ്ചേരി പോലീസ് കേസെടുത്തു.
