ജില്ലാ സമ്മേളനത്തില്‍ അവതരിപ്പിച്ച റിപ്പോര്‍ട്ട്‌
ആലപ്പുഴ: പാര്‍ട്ടി സ്ഥാനാര്‍ത്ഥി കഴിഞ്ഞ ലോക്‌സഭാ തെരഞ്ഞെടുപ്പില്‍ പരാജയപ്പെടാനുള്ള കാരണങ്ങളില്‍ ഒന്ന് ജനങ്ങള്‍ക്ക് പാര്‍ട്ടിയിലും നേതാക്കളിലുമുള്ള വിശ്വാസക്കുറവാണെന്ന് ജില്ലാ സമ്മേളനത്തില്‍ അവതരിപ്പിച്ച റിപ്പോര്‍ട്ടില്‍ പറയുന്നു. അഴിമതി, നിലം നികത്തല്‍, റിയല്‍ എസ്‌റ്റേറ്റ്, ബ്ലേഡ് കമ്പനി, മറ്റു ദുശീലങ്ങളെല്ലാം വളരെ ആഴത്തില്‍ പല സ്ഥലത്തും പാര്‍ട്ടിയുടെ അന്തസ് ഇടിയുന്ന നിലയില്‍ എത്തിയിട്ടുണ്ട്.
പല നേതാക്കളെയും ജനങ്ങള്‍ അവമതിപ്പോടെയാണു കാണുന്നത്. ചിലര്‍ വീടുകയറി വോട്ടു പിടിക്കാന്‍ പോകരുതെന്നു പോലും നിര്‍ദേശം നല്‍കേണ്ടി വന്നു. പാര്‍ട്ടി സംഘടനയുടെ ശോഷണവും റിപ്പോര്‍ട്ടില്‍ വ്യക്തമാക്കുന്നു. കൂട്ടായ പ്രവര്‍ത്തനത്തിന്റെ അഭാവം, വീഴ്ചകള്‍, വ്യക്തിവിരോധം, വിഭാഗീയത, സ്ത്രീകളെയും യുവജനങ്ങളെയും ആകര്‍ഷിക്കാന്‍ കഴിയാത്തത് തുടങ്ങി നിരവധി പ്രശ്‌നങ്ങളാണ് പാര്‍ട്ടി നേരിടുന്നത്.
ഡിവൈഎഫ്‌ഐയുടെ പ്രവര്‍ത്തനവും പരാജയമാണ്. രണ്ടായിരത്തിലധികം യൂണിറ്റുകള്‍ രൂപീകരിച്ചെങ്കിലും പ്രവര്‍ത്തനം തുടര്‍ച്ചയായി കൊണ്ടുപോകാന്‍ കഴിഞ്ഞില്ല. അതിനാല്‍ത്തന്നെ യുവജനങ്ങളെ പാര്‍ട്ടിയോടു അടുപ്പിക്കാനും സാധിച്ചില്ല. പാര്‍ട്ടി മെമ്പര്‍ഷിപ് പ്രവര്‍ത്തനത്തിലും കാര്യമായ പുരോഗതിയില്ല. യാതൊരു പ്രവര്‍ത്തനവും നടത്താത്തവര്‍ വരെ കമ്മറ്റികളില്‍ ഇടംപിടിക്കുന്നത് അവസാനിപ്പിക്കണം. വിഭാഗീയത പാര്‍ട്ടിയെ ശ്വാസം മുട്ടിക്കുകയാണ്. വ്യക്തി കേന്ദ്രീകൃതമാണു പല പ്രശ്‌നങ്ങളും. കഞ്ഞിക്കുഴിയിലെ വിഭാഗീയ പ്രശ്‌നങ്ങള്‍ പരിഹരിക്കുന്നതില്‍ പാര്‍ട്ടി ജില്ലാ കമ്മറ്റിക്ക് പരാജയം സംഭവിച്ചതായും റിപ്പോര്‍ട്ടിലുണ്ട്.
