കൃഷ്ണഗിരി (വയനാട്): കേരളത്തിന്റെ വിജയപ്രതീക്ഷയെ തകിടംമറിച്ച് ഹൈദരാബാദിനെതിരായ രഞ്ജി ട്രോഫി ക്രിക്കറ്റ് മത്സരം സമനിലയില് കലാശിച്ചു. ഹൈദരബാദിന്റെ ഓപ്പണിംഗ് ബാറ്റ്സ്മാന്മാരായ തന്മയ് അഗര്വാളും അക്ഷത് റെഡ്ഡിയും ക്ഷമയോടെ പന്തുകളെ നേരിട്ടതാണ് സ്കോറിങ് ഉയരാന് കാരണമായത്.
സെഞ്ചുറി നേടിയ ഓപ്പണര്മാര് 235 റണ്ണിന്റെ കൂട്ടുകെട്ടുണ്ടാക്കിയാണ് മടങ്ങിയത്. കൃഷ്ണഗിരിയിലെ ഏറ്റവും ഉയര്ന്ന കൂട്ടുക്കെട്ടാണ് ഇരുവരും ചേര്ന്ന് നേടിയത്. തന്മയാണ് ആദ്യം സെഞ്ച്വറി നേടിയത്. അര്ധസെഞ്ച്വറി വരെ പ്രതിരോധത്തിലൂന്നി ബാറ്റ് വീശിയ അക്ഷത് സ്കോറിങ് വേഗതകൂട്ടി. ഇതിനിടെ തന്മയ് അഗര്വാളിന്റെ വിക്കറ്റ് വീണു. 229 പന്തില് 110 റണ്ണെടുത്ത തന്മയിനെ സച്ചിന്ബേബി റൈഫിയുടെ കൈകളിലെത്തിക്കുകയായിരുന്നു. 15 ബൗണ്ടറികളുടെ പിന്ബലത്തിലായിരുന്നു തന്മയിന്റെ സെഞ്ച്വറി പ്രകടനം.
ടീം സ്കോര് 174ല് എത്തിയപ്പോള് മോനിഷിനെ സ്ട്രൈറ്റിലേക്ക് മനോഹരമായ സിക്സ് പറത്തിയാണ് അക്ഷത് കേരളത്തിന്റെ ഒന്നാമിന്നിങ്സ് ലീഡ് മറികടന്നത്. ആദ്യ ദിനങ്ങളില് ബൗളിങ്ങിനെ തുണച്ച പിച്ച് അവസാന രണ്ട് ദിനത്തില് ബാറ്റ്സ്മാന്മാര്ക്ക് അനുകൂലമായിരുന്നു. അവസാന രണ്ട് ദിനത്തില് ആകെ വീണത് രണ്ട് വിക്കറ്റുകള് മാത്രം. 15 ഓവറുകള് ശേഷിക്കേ ഇരു ക്യാപ്റ്റന്മാരും സമനിലക്ക് സമ്മതിച്ചതോടെ അമ്പയര്മാര് മത്സരം അവസാനിപ്പിച്ചു.
ഹൈദരാബാദിനായി അക്ഷത് റെഡ്ഡി 104 റണ്ണും മിലിന്ദ് അഞ്ച് റണ്ണുമെടുത്ത് പുറത്താകാതെ നിന്നു. 10 ബൗണ്ടറിയും രണ്ട് സിക്സുമടിച്ച് 225 പന്തുകളിലാണ് അക്ഷത് സെഞ്ച്വറി നേടിയത്. 200 റണ്ണും രണ്ടാമിന്നിങ്സില് ഹൈദരാബബാദിന്റെ ഏക വിക്കറ്റും നേടിയ സച്ചിന്ബേബിയാണ് കളിയിലെ താരം. മൂന്ന് കളികളില് മൂന്ന് പോയിന്റുള്ള കേരളം സി ഗ്രൂപ്പില് ആറാം സ്ഥാനത്താണ്്. കൃഷ്ണഗിരി സ്റ്റേഡിയത്തിലെ ആദ്യകളിയായ കേരളം-ആന്ധ്രപ്രദേശ് മത്സരവും സമനിലയിലാണ് കലാശിച്ചത്.
