കൊച്ചി: പച്ചാളം മേല്പ്പാലത്തിന്റെ അട്ടിമറിയും അഴിമതിയും അന്വേഷിക്കണമെന്ന് ആവശ്യപ്പെട്ട് ബിജെപി ജില്ലാ കമ്മറ്റിയുടെ ആഭിമുഖ്യത്തില് അനിശ്ചിതകാല ഉപവാസ സമരത്തിനായി നിര്മ്മിച്ച സമരപ്പന്തല് പൊളിച്ചുമാറ്റിയത് സംഘര്ഷമായി.
അനിശ്ചശ്ചിതകാല ഉപവാസസമരത്തിന്രെ ഉദ്ഘാടന സമയത്താണ് പോലീസ് അസിസ്റ്റന്റ് കമ്മീഷണര് സുരേഷിന്റെ നേതൃത്വത്തില് വന് പോലീസ് സംഘം പന്തല് പൊളിച്ചുമാറ്റിയത്. കുറച്ചുസമയം പോലീസും പ്രവര്ത്തകരും തമ്മില് സംഘര്ഷമുണ്ടായി.
എംഎല്എ ഹൈബി ഈഡന്റെ സമ്മര്ദ്ദപ്രകാരമാണ് പോലീസ് ഇത്തരത്തില് സമരങ്ങളെ നേരിടുന്നത്. അനുമതിയില്ലാത്ത പാലത്തിന് പോലീസ് സംരക്ഷണം കൊടുക്കുന്നത് ഇന്ത്യയിലെ ഏത് നിയമപ്രകാരമാണെന്ന് ബന്ധപ്പെട്ടവര് പറയണമെന്ന് ബിജെപി മണ്ഡലം സെക്രട്ടറിയും ജനകീയ സമരസമിതി ജനറല് കണ്വീനറുമായ അബിജു സുരേഷ് പറഞ്ഞു. ശക്തമായ സമരപരിപാടികളുമായി മുന്നോട്ടുപോകുമെന്നും അദ്ദേഹം കൂട്ടിച്ചേര്ത്തു.
