ചങ്ങനാശ്ശേരി: വാഴപ്പള്ളിയില് ആര്എസ്എസ് പ്രവര്ത്തകര്ക്കുനേരെ സിപിഎം അക്രമം. 3 ആര്എസ്എസ് പ്രവര്ത്തകര്ക്ക് പരിക്കേറ്റു. വാഴപ്പള്ളി കല്ക്കുളത്ത് കാവ് ക്ഷേത്രത്തിലെ സംഘസ്ഥാനില്കയറിയാണ് സിപിഎം ലോക്കല്ക്കമ്മറ്റി സെക്രട്ടറിയുടെയും രണ്ട് നഗരസഭാ കൗണ്സിലര്മാരുടെയും നേതൃത്വത്തില് അക്രമം നടത്തിയത്. ഇന്നലെ ക്ഷേത്രത്തിലെ ദീപാരാധനയ്ക്കുശേഷം സംഘസ്ഥാനില് ഇരിക്കുകയായിരുന്ന ആര്എസ്എസ് പ്രവര്ത്തകരായ കൃഷ്ണരാജ്, ഹരിശങ്കര്, അഭിജിത്ത് എന്നിവര്ക്കാണ് മര്ദ്ദനമേറ്റത്. കമ്പിവടികളും കരിങ്കല് ചീളുകളുമായി ബൈക്കുകളിലെത്തിയാണ് അക്രമം നടത്തിയത്. കൈക്കും കാലിനും തലയ്ക്കും പരുക്കേറ്റ ആര്എസ്എസ് പ്രവര്ത്തകരെ ചങ്ങനാശ്ശേരി ജനറല് ആശുപത്രിയില് പ്രവേശിപ്പിച്ചു. ആശുപത്രിയിലെത്തിയും സിപിഎം അക്രമിസംഘം ആര്എസ്എസ് പ്രവര്ത്തകര്ക്കുനേരെ ഭീഷണി മുഴക്കി. സിപിഎം ലോക്കല് കമ്മറ്റി സെക്രട്ടറി അജി തങ്കപ്പന്, നഗരസഭാ കൗണ്സിലര്മാരായ സുരേഷ് ബാബു, ശിവകുമാര്, എല്സി സെക്രട്ടറിയുടെ മകന് കണ്ണന് എന്നിവരുടെ നേതൃത്വത്തിലായിരുന്നു അക്രമമെന്ന് പരുക്കേറ്റവര് പറഞ്ഞു. അക്രമികളുടെ വിളയാട്ടത്തില് ക്ഷേത്രത്തിലെ കല്വിളക്കുകളും മറ്റും തകര്ന്നു.
ക്ഷേത്രത്തില് അക്രമം നടത്തിയതില് ക്ഷേത്രഭരണസമിതി പ്രതിഷേധിച്ചു.
